Հայաստանի նախկին նախագահը և անձնագիր 500 հազար դոլարով. հետաքննության նոր մանրամասներ

ՀՀ նախկին նախագահ Արմեն Սարգսյանի օտարերկրյա քաղաքացիության փաստով հարուցված քրեական գործի նախաքննությունը շարունակվում է։

Այս մասին Sputnik Արմենիայի հարցմանն ի պատասխան հայտնել են ՀՀ քննչական կոմիտեում։

Քննչական կոմիտեում հարցրեցինք՝ արդյոք կառույցը տեղեկություն ունի Սարգսյանի գտնվելու վայրի մասին և արդյոք նրա մասնակցությամբ կատարվել են քննչական գործողություններ։

«Այս քրեական գործով նախաքննությունը շարունակվում է։ Ինչ վերաբերում է մնացած պահանջվող տեղեկատվության տրամադրմանը, ելնելով նախաքննության տվյալների հրապարակման անթույլատրելիությունից, դրանք հնարավոր չէ տրամադրել»,- ասված է Քննչական կոմիտեի հաղորդագրությունում։

Հիշեցնենք, որ Հայաստանի նախագահ Արմեն Սարգսյանը հրաժարական է տվել 2022 թվականի հունվարի 23-ին։ Սարգսյանը որպես այս որոշման պատճառ նշել է պատշաճ լիազորությունների բացակայությունը, ինչը, ըստ նրա, թույլ չի տալիս նախագահին ազդել քաղաքական գործընթացների վրա։ Հաջորդ օրը Hetq.am-ում հայտնվել են տեղեկատվություններ այն մասին, որ Սարգսյանը առնվազն նախագահ ընտրվելուց առաջ ուներ Կարիբյան փոքրիկ պետության՝ Սենթ Քիթս և Նևիսի քաղաքացիություն։ Նա իրավունք չուներ ընտրվելու նախագահի պաշտոնում։

Սարգսյանը, ըստ հրապարակման, Կարիբյան ծովի Սենթ Քիթս և Նևիսի պետության քաղաքացիություն է ստացել՝ 500 հազար դոլար ներդրման դիմաց։