Ադրբեջանի էներգետիկայի նախարարը՝ Զանգեզուրի միջանցքի բացման և գազի արտահանման մասին

Զանգեզուրի միջանցքի բացումը կապահովի Կասպյան տարածաշրջանից և Կենտրոնական Ասիայից Նախչըվանի վրայով Թուրքիա և համաշխարհային շուկաներ ածխաջրածինների և «կանաչ էներգիայի» մատակարարման եզակի երթուղի։

Ինչպես հաղորդում է Report-ը, այս մասին հայտարարել է Ադրբեջանի էներգետիկայի նախարար Փարվիզ Շահբազովը՝ Թուրքիայի Իզմիր քաղաքում կայացած Ադրբեջան-Թուրքիա չորրորդ էներգետիկ ֆորումում։

Նախարարի խոսքով՝ Իգդիր-Նախչըվան գազատարը, որը հսկայական տարածաշրջանի էներգետիկ քարտեզը ձևավորող նախագծերից մեկն է, նաև Ադրբեջանի և Թուրքիայի միասնական քաղաքական կամքի արդյունք է։

«Իգդիր-Նախչըվան գազատարը ոչ միայն ապահովում է բնական գազի անմիջական մատակարարում Նախչըվանի և Թուրքիայի միջև ցամաքային գծով, այլև ստեղծում է հակադարձ հոսքի հնարավորություն՝ թողունակության աճի շնորհիվ։ Այս խողովակաշարը Ադրբեջանի և Թուրքիայի միջև ռազմավարական էներգետիկ գործընկերության նոր դարպաս է, որը բացվում է Նախչըվանի միջոցով», - ասել է նա։

Շահբազովը շեշտել է, որ Զանգեզուրի միջանցքը, բացի Ադրբեջանի հիմնական մասը Նախչըվանի հետ կապող անարգել երթուղի լինելուց, կամրապնդի Թուրքիայի հարաբերությունները այլ թյուրքական պետությունների հետ էներգետիկայի և հաղորդակցության ոլորտներում, «մեր երկրները կդարձնի Միջին միջանցքի հիմնական կենտրոններից մեկը էներգետիկայի, տրանսպորտի և տարանցման ոլորտում»։