Ամին Տարաֆոն՝ Իրան-Ադրբեջան-Վրաստան տարանցիկ միջանցք ստեղծելու ծրագրերի մասին TRACECA-ի շրջանակներում

Իրանը առաջարկում է TRACECA-ի շրջանակներում ստեղծել Իրան-Ադրբեջան-Վրաստան տարանցիկ միջանցք։

Ինչպես հաղորդում է Report-ը՝ հղում անելով իրանական լրատվամիջոցներին, այս մասին հայտարարել է Իրանի ճանապարհների և քաղաքային զարգացման նախարարի խորհրդական Ամին Տարաֆոն։

Նա նշել է, որ նախաձեռնությունը հնչեցվել է Իրանի ճանապարհների և քաղաքային զարգացման նախարար Ֆարզանա Սադիքի վերջերս Ադրբեջան կատարած այցի ժամանակ և արժանացել է պաշտոնյաների հավանությանը։

Նախարարի խորհրդականի խոսքով՝ այս տարի Իրանի ճանապարհների և քաղաքային զարգացման նախարարը կգլխավորի TRACECA-ի միջկառավարական հանձնաժողովը։

Բացի այդ, Տարաֆոն ընդգծել է, որ Իրանի և Թուրքմենստանի միջև կարող է կնքվել «ճանապարհային քարտեզի» վերաբերյալ համաձայնագիր, որը ենթադրում է տարանցիկ փոխադրումների տարեկան ծավալը հասցնել 20 միլիոն տոննայի։