Անկարան սպասում է Բաքվի համաձայնությանը՝ Զանգեզուրի միջանցքի շուրջ Երևանի հետ երկխոսություն սկսելու համար

Թուրքիայի տրանսպորտի և ենթակառուցվածքների նախարար Աբդուլքադիր Ուրալօղլուն հայտարարել է Անկարայի պատրաստակամության մասին՝ եռակողմ հանդիպում անցկացնելու Ադրբեջանի և Հայաստանի տրանսպորտի նախարարների հետ։

Ըստ APA-ի՝ նա նշել է, որ նախաձեռնությունը կախված է Բաքվի դիրքորոշումից։

«Մենք հաճախակի հանդիպում ենք Ադրբեջանի թվային զարգացման և տրանսպորտի նախարար Ռաշադ Նաբիևի հետ։ Մենք նաև շփվել ենք Հայաստանի տրանսպորտի նախարարի հետ։ Եռակողմ հանդիպման անցկկացումը հնարավոր է միայն Ադրբեջանի համաձայնությամբ։ Եթե այդ համաձայնությունը լինի, մենք լիովին պատրաստ ենք», - նշել է Ուրալօղլուն։

Նախարարը հավելել է, որ Զանգեզուրի միջանցքի բացման նախապատրաստական աշխատանքները ընթանում են բարձր մակարդակով, և որ Ադրբեջանի հետ բավականաչափ համակարգված աշխատանք է իրականացվել. «Մենք նախապես պլանավորել ենք, թե ինչ պետք է արվի խաղաղության գործընթացի լիարժեք ավարտից հետո։ Բոլոր անհրաժեշտ նախապատրաստական աշխատանքները կատարվել են։ Անցյալում մենք բազմաթիվ համատեղ նախագծեր ենք իրականացրել, ուստի անհրաժեշտություն չկա դրանք նորից սկսելու»։