Էրդողանն ընդունել է Ադրբեջանի, Ռուսաստանի, Իրանի և Հայաստանի ԱԳՆ ղեկավարներին

Թուրքիան կշարունակի լիարժեք աջակցություն ցուցաբերել Ադրբեջանի և Հայաստանի միջև կայուն խաղաղություն հաստատելու ջանքերին։

Ինչպես հաղորդում է Caliber.Az-ը, այս մասին հայտարարել է Թուրքիայի նախագահ Ռեջեփ Թայիբ Էրդողանը Ստամբուլում «3+3» տարածաշրջանային հարթակի մասնակից երկրների արտգործնախարարների հետ հանդիպմանը։

«Տարածաշրջանում իրադարձությունների զարգացումը պահանջում է համագործակցության և համերաշխության ամրապնդում, իսկ հարթակը ինստիտուցիոնալ կառույցի վերածելը երկխոսության մեխանիզմն ավելի արդյունավետ կդարձնի»,- Էրդողանի խոսքերն է մեջբերում նրա մամուլի ծառայությունը։

Էրդողանը հայտարարել է, որ Թուրքիան մեծ նշանակություն է տալիս «3+3» հարթակին, որը կոչված է ապահովելու տարածաշրջանային խնդիրների լուծումը երկրների միջև ուղիղ երկխոսության միջոցով։ «Ուրախալի է տեսնել, թե ինչպես է փոխվում Հարավային Կովկասի դեմքը դեպի կայուն խաղաղություն», - ասել է նա։