Էրդողանը՝ Զանգեզուրի միջանցքի կարևորության մասին

Ես հավատում եմ, որ Հարավային Կովկասը կգտնի երկար սպասված խաղաղություն։

Ինչպես հաղորդում է TRT Haber-ը, այս մասին հայտարարել է Թուրքիայի նախագահ Ռեջեփ Թայիբ Էրդողանը՝ պատասխանելով լրագրողի հարցին Զանգեզուրի միջանցքի և Հարավային Կովկասում խաղաղության գործընթացի մասին։

«Ես այս հույսը տեսա պարոն Իլհամ Ալիևի մոտ նրա հետ մեր երկկողմ հանդիպման ժամանակ։ Սպիտակ տանը ստորագրված փաստաթղթերը, անշուշտ, արագացրին Հայաստանի և Ադրբեջանի միջև հարաբերությունների կարգավորման գործընթացը։ Ադրբեջանն ու Հայաստանը զգալիորեն հաղթահարել են խաղաղության ճանապարհին առկա խոչընդոտները և հասել են վերջնական փուլին։ Ես բովանդակալից հանդիպում ունեցա Ադրբեջանի նախագահ Իլհամ Ալիևի, ապա՝ Հայաստանի վարչապետ Նիկոլ Փաշինյանի հետ։ Երկու հանդիպումների ժամանակ էլ տեսա, որ Ալիևն ու Փաշինյանը նույն ալիքի վրա են։ Նրանք նույն ուղղությամբ են նայում։ Զանգեզուրի միջանցքի հարցում խնդիրներ կամ տարաձայնություններ չկան», - ասել է նա։

Թուրքիայի առաջնորդը նշել է, որ Ադրբեջանի նախագահ Իլհամ Ալիևն այս հարցում շատ ավելի վստահ է։ Հատկապես Միացյալ Նահանգներում կայացած հանդիպումից հետո, որը որոշիչ գործոն դարձավ նրանց հետագա քայլերի համար։

«Խաղաղության հաստատմամբ մեր տարածաշրջանում կակտիվացվեն ցամաքային և երկաթուղային ճանապարհները, ինչը շատ կարևոր է, կբացվեն սահմանային անցակետերը, և շատ ոլորտներ, մասնավորապես՝ առևտուրը, դրական ազդեցություն կստանան։ Ակնկալվում է, որ դա դրական ազդեցություն կունենա նաև մեզ վրա։ Տարածաշրջանի երկրները նույնպես կօգտվեն համագործակցության նոր հնարավորություններից։ Սա բացարձակապես ակնհայտ է։ Ռուսաստանը և Իրանը նույնպես ապագայում կհասկանան, որ իրենց անհանգստություններն ապարդյուն էին», - հավելել է Էրդողանը։