«Haber Global-ը պատմել է Հայաստանի պատերազմի նախապատրաստության մասին

Եվրամիությունը՝ Ֆրանսիայի ղեկավարությամբ, Հայաստանին զինելու նախագիծ է պատրաստել:
 
Այս մասին ասվում է թուրքական Haber Global հեռուստաալիքի կայքում հրապարակված՝ «Հայաստանը անօդաչու թռչող սարքերի որոնման մեջ». «Աջակցություն Հայաստանին զինելու հարցում՝ Եվրամիության (ԵՄ) կողմից» խորագրով  հոդվածում:
 
Նշվում է, որ Փարիզը, Դելին և Աթենքը հանդիսանում են Հայաստանին զինող հիմնական խաղացողները:
 
«Թեև Երևանը ներկայումս ստանում է 10 միլիոն եվրոյի ռազմական օգնություն, սակայն այդ աջակցությունը կընդլայնվի։ Ըստ աղբյուրների՝ Երևանը փորձում է անօդաչու թռչող սարքեր ձեռք բերել՝ նախապատրաստվելով հաջորդ պատերազմին»։
 
Հոդվածում ասվում է, որ ԵՄ-ի ռազմական օգնությունը Հայաստանին հակասում է խաղաղության նախաձեռնության նրա կոչերին.
 
«Եվրամիության պաշտոնատար անձինք ասում են, որ Հարավային Կովկասում պետք է խաղաղություն հաստատվի: Բայց կազմակերպությունը խոչընդոտում է այս նախաձեռնությունը՝ զինելով կողմերից մեկին։ Հայաստանը, զգալով ԵՄ աջակցությունը, կարող է դադարեցնել Ադրբեջանի հետ խաղաղ բանակցությունները: Ֆրանսիացի պաշտոնատար անձինք  ասում են, որ Հայաստանը, վերազինվելով, կարող է ամուր դիրք գրավել խաղաղ բանակցություններում»։