Ադրբեջանն ու Չինաստանը նպատակ ունեն ընդլայնել «Միջին միջանցքի» հնարավորությունները

«Ադրբեջանական երկաթուղիներ» ՓԲԸ-ի նախագահ Ռովշան Ռուստամովը հանդիպել է չինական «China Railway Container Transport Corp. Ltd.» (CRCT) ընկերության նախագահ Յանգ Բինգի գլխավորած պատվիրակության հետ:

Ինչպես Caliber.Az-ին հայտնել են ընկերության մամուլի ծառայությունից, քննարկվել են երկաթուղու և լոգիստիկայի ոլորտում երկկողմ համագործակցության ընդլայնման, ինչպես նաև «Միջին միջանցքով» բեռնափոխադրումների ծավալների ավելացման հեռանկարները։

Կողմերը հայտարարել են, որ սեպտեմբերի 19-20-ը կայանալիք «Մետաքսի ճանապարհ» միջազգային ցուցահանդեսում CRTC-ը կմիանա Ադրբեջանի, Ղազախստանի և Վրաստանի համատեղ «Middle Corridor Multimodal Ltd.» ձեռնարկությանը։

Հայտարարվել է, որ 2024 թվականի սկզբից Չինաստանից Ադրբեջանի տարածքով «Միջին միջանցքով» ուղարկվել է 212 կոնտեյներային բլոկ գնացք։ Կոնտեյներները Բաքու են հասնում 8-10 օրում, իսկ Սև ծովի նավահանգիստները՝ 10-12 օրում։