Մոսկվայում տեղի կունենա՝ Ադրբեջանի, Իրանի և Ռուսաստանի տրանսպորտի նախարարների հանդիպումը

Այս տարվա հունվարի 28-ին Մոսկվայում տեղի կունենա՝ Ադրբեջանի, Իրանի և Ռուսաստանի տրանսպորտի նախարարների հանդիպումը։
 
Ինչպես հաղորդում է Caliber.Az-ը՝ Irna-ին հղումով, այս մասին հայտարարել է Իրանի ճանապարհների և քաղաքաշինության նախարար Ֆարզանա Սադիգը՝ Բաքվի և Թեհրանի միջև տնտեսական, առևտրային և հումանիտար համագործակցության միջկառավարական համատեղ հանձնաժողովի 16-րդ նիստի ժամանակ։
 
Նրա խոսքով, կողմերը նպատակ ունեն՝ Հյուսիս-Հարավ տրանսպորտային միջանցքով փոխադրումները հասցնել 15 միլիոն տոննայի։
 
«Հուսով եմ, որ հունվարի 28-ին Մոսկվայում կայանալիք հանդիպմանը բոլոր երեք երկրները համապատասխան պայմանավորվածություններ ձեռք կբերեն՝ «Հյուսիս-Հարավ» միջանցքի շրջանակներում տարանցիկ գործունեության զարգացման վերաբերյալ»,- հավելել է Ֆ.Սադիգը:
 
Նա ընդգծել է, որ անցյալ տարի Իրանի և Ադրբեջանի միջև ապրանքաշրջանառությունն աճել է 20%-ով և կազմել  է 580 մլն դոլար։