Պապուաշվիլի. Որոշ երկրներ աջակցում են խոսքով, իսկ Ադրբեջանը՝ գործով

Վրաստանը միշտ զգացել է Ադրբեջանի աջակցությունը՝ հատկապես երկրի տարածքային ամբողջականության և ինքնիշխանության պաշտպանության հարցերում։
 
Ինչպես հաղորդում է Report-ը, այս մասին հայտարարել է Վրաստանի խորհրդարանի խոսնակ Շալվա Պապուաշվիլին՝ Թբիլիսի ժամանած Ադրբեջանի խորհրդարանի պատվիրակության հետ հանդիպմանը։
 
«Որոշ երկրներ իրենց աջակցությունն արտահայտում են խոսքերով, իսկ Ադրբեջանը դա ցույց է տալիս գործով։ Մենք երախտապարտ ենք Ադրբեջանի նախագահին, խորհրդարանին և բարեկամ ադրբեջանական ժողովրդին»,- ընդգծել է Պապուաշվիլին։
 
Նրա խոսքով, երկրների հարաբերությունները հասել են ռազմավարական գործընկերության մակարդակի, ինչը նոր հնարավորություններ է բացում համագործակցության զարգացման համար, այդ թվում՝ միջխորհրդարանական մակարդակով։
 
Ադրբեջանական պատվիրակությունը բանակցություններ է վարել նաև՝ Վրաստանի խորհրդարանի կոմիտեների նախագահների և բարեկամության խմբի անդամների հետ։