ՌԴ ԱԳՆ-ն հարգում է Ադրբեջանի և Հայաստանի ուղիղ երկխոսություն վարելու որոշումը

Ռուսաստանը հարգում է Հայաստանի և Ադրբեջանի՝ ուղիղ երկխոսության շրջանակներում երկկողմ հարաբերությունների կարգավորման վրա աշխատելու որոշումը:
 
Ինչպես հաղորդում է «Ինտերֆաքս»-ը, այս մասին հայտարարել է՝ Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան։
 
«Ռուսաստանը շահագրգռված է կայուն, անվտանգ, խաղաղ և բարգավաճող Հարավային Կովկասով։ Եվ դրան հասնելու անհրաժեշտ պայմաններից մեկը, իհարկե, Բաքվի և Երևանի երկար սպասված հաշտեցումն է», - հինգշաբթի  ճեպազրույցի ժամանակ ասել է Զախարովան։
 
Նա հիշեցրել է, որ «Ռուսաստանի և անձամբ նախագահ Վլադիմիր Պուտինի անմիջական աջակցությամբ, 2020 թվականին մեկնարկել է հայ-ադրբեջանական հարաբերությունների կարգավորման  մեծ փուլը»։
 
«Որոշակի պահի Հայաստանն ու Ադրբեջանը նախընտրեցին երկկողմ ուղիղ երկխոսությունը, մենք հարգում ենք այս ընտրությունը։ Ի վերջո, հարցն այն է, որ նրանք  պետք է  պայմանավորվեն և ապրեն միմյանց հետ, հարևանների հետ։ Հետևաբար, եթե նրանք գտել են ուղիղ երկխոսության հնարավորություն, այո, դա նրանց ընտրությունն է, ինչը նշանակում է, որ մեր խոսածի մեծ մասը ստացվում է», - հայտարարել է Ռուսաստանի արտաքին գործերի նախարարության պաշտոնական ներկայացուցիչը։
 
Նա ընդգծել է, որ ռուսական կողմը «շարունակում է պատրաստ լինել անհրաժեշտ օգնություն ցուցաբերելու գործընկերներին»։