Թուրքական պարբերական. Փարիզը խաղալիք է դարձել հայկական սփյուռքի ձեռքում

Միջազգային հանրությունը կարող է կարևոր ներդրում ունենալ Հարավային Կովկասում երկարաժամկետ խաղաղության և կայունության հաստատման գործում՝ ավելի մեծ ուշադրություն դարձնելով տարածաշրջանում տիրող իրավիճակին և հրաժարվելով կողմնակալությունից:

Ինչպես հաղորդում է AZERTAC-ը, այս մասին ասվում է թուրք փորձագետ Մեհմեդ Յահյա Չիչեքլիի հոդվածում, որը STAR թերթի էջերում վերլուծել է Բաքվի և Երևանի միջև խաղաղության հեռանկարները։

Վերլուծաբանն ընդգծում է, որ Ադրբեջանի հետ խաղաղության պայմանագրի ստորագրումն առաջին հերթին օգուտ կբերի հենց Հայաստանին, որը կկարողանա կարգավորել հարաբերությունները Բաքվի և Անկարայի հետ՝ դրանով իսկ ապահովելով կայուն կապեր բոլոր հարևան պետությունների հետ։

Սակայն, ըստ հեղինակի, Հայաստանում ռացիոնալ գնահատականների կողմնակիցները «ի զորու չեն հաղթել հավակնոտ շովինիզմին»։ «Գաղտնիք չէ, որ Հայաստանի արմատական շրջանակներում և ընդհանուր առմամբ հայկական սփյուռքում քարոզվում է Ղարաբաղյան Երրորդ պատերազմին նախապատրաստվելու և այդ ուղղությամբ միջազգային ընկալում ձևավորելու գաղափարը: Տարածաշրջանում վստահության մթնոլորտի ձևավորման մեկ այլ լուրջ խոչընդոտ է ներքին քաղաքական ուժերի ճնշումը»,- նշում է Չիչեքլին։