Ռաշտ-Աստարա երկաթուղի. ե՞րբ է նախատեսվում շինարարական պայմանագրի ստորագրումը

Իրանական պատվիրակությունը ամսվա ընթացքում կայցելի Ռուսաստան՝ Ռաշտ-Աստարա երկաթուղային գծի կառուցման պայմանագիրը ստորագրելու համար։

Ինչպես հաղորդում է ՏԱՍՍ-ը, այս մասին հայտարարել է իսլամական հանրապետության տրանսպորտային ենթակառուցվածքների կառուցման և զարգացման գծով տնօրեն Հուշանգ Բազվանդը:

«Կանխատեսումների համաձայն՝ մեկ ամսից քիչ ժամանակում իրանական պատվիրակություն կուղարկվի Ռուսաստան՝ պայմանագիրը վերջնականապես կնքելու համար, որից հետո փաստորեն կսկսվեն Ռաշտ-Աստարա երկաթուղու շինարարական աշխատանքները», - ասել է նա մամուլի ասուլիսի ժամանակ։

Բազվանդի խոսքով՝ իրանական կողմը ընդունել է երկաթուղային հատվածի նախագծման և կառուցման վերաբերյալ Ռուսաստանի առաջարկների մոտ 70%-ը։ Նա հավելել է, որ գլխավոր կապալառու է ընտրվել «Հաթամ ալ-Անբիա» շինարարական ընկերությունը, որը մտնում է Իսլամական հեղափոխության պահապանների կորպուսի (ԻՀՊԿ, Զինված ուժերի էլիտար ստորաբաժանում) կառուցվածքի մեջ։

2023 թվականին Ռուսաստանը և Իրանը Հյուսիս-Հարավ նախագծի շրջանակներում համաձայնագիր են ստորագրել Ռեշտ-Աստարա երկաթուղու 160 կիլոմետրանոց հատվածի համատեղ կառուցման մասին, որը կոչված է մուտք ապահովել Պարսից ծոցի նավահանգիստներ: Նախագծի ընդհանուր արժեքը կազմում է 1,6 միլիարդ եվրո: Մոսկվան և Թեհրանը համատեղ կֆինանսավորեն նախագծումը, շինարարությունը և ապրանքների և ծառայությունների մատակարարումը: