Զախարովան մեղադրել է Հայաստանին, որը փորձում է Ռուսաստանին մեղադրել իր սխալների համար

Երևանի արձագանքը ՌԴ ԱԳ նախարար Սերգեյ Լավրովի՝ եռակողմ պայմանավորվածությունների կատարման մասին հայտարարությանը, խոսում է այն մասին, որ Հայաստանը փորձում է սեփական սխալների և ռազմավարական սխալ հաշվարկների համար մեղքը բարդել Ռուսաստանի վրա։ Այս մասին հայտարարել է ՌԴ ԱԳՆ պաշտոնական ներկայացուցիչ Մարիա Զախարովան, փոխանցում է ՏԱՍՍ-ը։

«Մենք տեսանք Հայաստանի ԱԳՆ-ի նման արձագանքը ՌԴ ԱԳ նախարար Սերգեյ Լավրովի արտահայտությանը։ Սա պաշտոնական Երևանի գծի հերթական օրինակն է՝ սեփական սխալների և ռազմավարական սխալ հաշվարկների համար մեղքը բարդել ուրիշներ վրա: Մասնավորապես, այս դեպքում՝ Ռուսաստանի վրա»,-ճեպազրույցում պարզաբանել է դիվանագետը։

Զախարովան նշել է, որ Երևանը, սաբոտաժի ենթարկելով եռակողմ պայմանավորվածությունները, «հերթական անգամ գործում է Արևմուտքի թելադրանքով»։ Նրա խոսքով, Հայաստանը այսպիսով բաց է թողնում ոչ միայն տրանսպորտային կապեր հաստատելու հնարավորությունը՝ ի շահ սեփական տնտեսության, այլև նպաստելու տարածաշրջանում իրավիճակի կարգավորմանը։