Հայաստանը պետք է տարածաշրջանում խաղաղ գոյակցության հնարավորություններ գտնի. Վահագն Խաչատրյան

«Մենք լավատեսորեն ենք տրամադրված, որովհետև իսկապես ցանկանում ենք Հայաստանի և Ադրբեջանի միջև խաղաղության պայմանագրի ստորագրում։ Չէ որ առանց հարևանների խաղաղ գոյության այդ տարածաշրջանում հնարավոր չէ առաջ շարժվել ոչ միայն մեզ, այլև մյուս երկրներին։ Ես նկատի ունեմ և՛ Թուրքիային, և՛ Իրանին, և՛ Ադրբեջանին, և՛ Վրաստանին, և՛ Հայաստանին»։

Այս մասին DW-ին տված հարցազրույցում հայտարարել է ՀՀ նախագահ Վահագն Խաչատուրյանը՝ մեկնաբանելով Բրյուսելում տեղի ունեցած եռակողմ բանակցությունները։

«Մենք պետք է խաղաղ գոյակցության հնարավորություններ գտնենք։ Հիմա դա իրական է, մանավանդ որ կան միջնորդներ: Մենք պետք է օգտագործենք այդ հնարավորությունները», – ասել է նա։

Խաչատուրյանը հիշեցրել է, որ սա Ադրբեջանի նախագահի և Հայաստանի վարչապետի միջև արդեն երրորդ հանդիպումն է: Նրա խոսքով՝ դա հույս է տալիս, որ ԵՄ-ն ցանկանում է գործը հասցնել ավարտին, այսինքն՝ ընդհուպ մինչև Հայաստանի և Ադրբեջանի միջև խաղաղության փաստաթղթի ստորագրումը։

«Իհարկե, դժվար ճանապարհ է լինելու, քանի որ հակամարտությունը շարունակվում է 1990-ականներից։ Բայց գլխավորն այն է, որ երկուստեք ցանկություն կա, և կան մարդիկ, ովքեր ցանկանում են օգնել երկու կողմերին համաձայնության գալ»,- ասել է ՀՀ նախագահը։