Պեսկով. Հայաստանի որոշումը՝ վավերացնել Հռոմի ստատուտը, կոռեկտ չէ

ՌԴ նախագահի մամուլի քարտուղար Դմիտրի Պեսկովը ճեպազրույցի ժամանակ մեկնաբանել է՝ Միջազգային քրեական դատարանի (ՄՔԴ) Հռոմի ստատուտը վավերացնելու Հայաստանի խորհրդարանի որոշումը։

Газета.Ru-ի փոխանցմամբ, Պեսկովի խոսքով՝ Մոսկվան չէր ցանկանա, որ ՌԴ նախագահ Վլադիմիր Պուտինը ստիպված լինի հրաժարվել Հայաստան այցելություններից՝ երկիր, որը Ռուսաստանի դաշնակիցն է, բարեկամ պետությունն ու գործընկերը։

Կրեմլի ներկայացուցիչը նշել է, որ Հայաստանի և Ռուսաստանի ժողովուրդներին շատ բան է միավորում և միշտ միասնական են լինելու, սակայն, միաժամանակ, Հայաստանի ղեկավարության համար լրացուցիչ հարցեր են առաջանալու, որոնք նախապես փոխանցվել են նրանց։

«Մենք կասկածում ենք և կասկածում էինք սկզբից, որ երկկողմ հարաբերությունների տեսանկյունից Հայաստանի միացումը ՄՔԴ-ի Հռոմի ստատուտին կոռեկտ չէ։ Մենք դա համարում ենք ոչ կոռեկտ որոշում»,- ասել է Պեսկովը։