Տիգրան Եգավյան. Հայաստանը չի կարող ինքնուրույն տնօրինել իր ճակատագիրը և պետք է դառնա Ռուսաստանի մարզ

«Երբեք փոխվստահություն չի եղել։ Պատերազմը մեզ ցույց տվեց, որ առավել քան երբևէ Հայաստանի և Սփյուռքի միջև փոսը խորացել է։ Կարող ենք արձանագրել, որ վստահության թելերը կտրված են։ Չկա առողջ հիմք գործնական հարաբերություններ մշակելու համար։ Մինչև հիմա Հայաստանի և Սփյուռքի կապը հիմնված էր երկու բանի վրա․ առաջին՝ զբոսաշրջության, երկրորդը՝ մարդասիրական օժանդակության։ Կարելի է նշել նաև սահմանափակ ազդեցություն ունեցող ներդրումները։ Դժբախտաբար, սա ոչ միայն ներկա իշխանությունների խնդիրն է, այլ ավելի վաղ ծագում ունի՝ նախքան Հայաստանի անկախացումը, անկախության շարժումը»։

Ինչպես հաղորդում է Caliber.Az-ը՝ վկայակոչելով հայկական մամուլին, այս մասին հայտարարել է արևելագետ, քաղաքագետ Տիգրան Եգավյանը:

Նրա խոսքով, սփյուռքահայ կազմակերպությունները պատրաստ չէին ընդունել, որ Հայաստանը անկախ պետություն դառնա, քանի որ մտահոգված էին, թե կորցնելով ռուսական երաշխավորությունը՝ Հայաստանը թիրախ կդառնանք պանթուրքիզմի համար։

«Այսինքն՝ գլխավոր խնդիրը պետականության գաղափարի շուրջ էր։ Ընդհանրապես սփյուռքահայերը քաղաքական միտք չունեցող մարդիկ են, որոնք վերացական գաղափար ունեն Հայաստանի, ազգի, Հայ դատի և պետության մասին, նրանք չեն կարողանում նորմալ ձևով ըմբռնել, թե ինչ է նշանակում պետություն ունենալը։ Պատերազմը մեզ ապացուցեց, որ մենք պետական մշակույթ չունեցող ազգ ենք», - ասել է նա։

Քաղաքագետի խոսքով, ֆրանսահայերը այդքան էլ հետաքրքրված չեն Հայաստանի հասարակական-քաղաքական հարցերով:

Նրա խոսքով, Հայաստանն այնպիսի ծանր վիճակում է, որ արդեն չի կարողանում տնօրինել իր ճակատագիրը։ Այս իրավիճակում երկու ընտրություն կա․ կամ Հայաստանը պետք է դառնա Ռուսաստանի մարզ, կամ էլ օգտվել սփյուռքի ողջ ներուժից: