Քաղաքագետ Չեչելաշվիլի. ԵՄ-ն առանց Ադրբեջանի չի կարողանա համագործակցել Կենտրոնական Ասիայի հետ

«Ֆրանսիայի Սենատի կողմից Ադրբեջանի դեմ ընդունված բանաձևն ինձ համար անսպասելի չէր, քանի որ բոլորս լավ գիտենք Ֆրանսիայի տրամադրությունները։ Ֆրանսիան հայամետ երկիր է, որը վերջին շրջանում մշտապես հանդես է գալիս այնպիսի դիրքերից, որոնք, ընդհանուր առմամբ, հասկանալի զայրույթ են առաջացնում Ադրբեջանում»։

Ինչպես հաղորդում է Caliber.Az-ը, այս մասին վրացի քաղաքագետ Վալերի Չեչելաշվիլին հայտարարել է YouTube-ի «Caucasus News» ալիքի հետ զրույցում՝ մեկնաբանելով Ֆրանսիայի Սենատի բանաձևը։

«Ուստի դա ինձ համար զարմանալի չէր: Ինձ համար զարմանալին այլ բան էր. ես, ճիշտն ասած, չէի սպասում, որ Ֆրանսիայի խորհրդարանում միայն մեկ մարդ կգտնվի, ով դեմ կքվեարկի այս բանաձևին։ Ճիշտն ասած, Ֆրանսիայի խորհրդարանում նման միաձայնությունն ինձ զարմացրեց։ Ի՞նչ եզրակացություններ կարելի է անել սրանից։

Սակայն այս առումով ուզում եմ խոսել Եվրախորհրդարանի կողմից ընդունված մեկ այլ բանաձևի մասին։ Նույնպես ձայների ճնշող մեծամասնությամբ։ Եվրախորհրդարանը բանաձև է ընդունել Կենտրոնական Ասիայի երկրների հետ Եվրամիության համագործակցության, գործընկերության և, ստույգ չեմ հիշում, հարաբերությունների մասին։ Հիմա, եթե նայեք այս ամենին, կարող եք շատ պարզ եզրակացություն անել. Ինչպե՞ս կզարգացնի ԵՄ-ն հարաբերությունները Կենտրոնական Ասիայի երկրների հետ, եթե հարաբերությունները չզարգացնի Ադրբեջանի հետ։ Շատ դժվար է պատկերացնել: Որովհետև դա անելու այլ ճանապարհ չկա: Հարավային Կովկասի այս նեղ տարածությունը՝ Կասպից և Սև ծովերի միջև, որը հանդիսանում է տրանսպորտային և հաղորդակցության հիմնական միջանցքը, և Կենտրոնական Ասիան կապում է ԵՄ-ի ու, փաստորեն, Եվրոպայի հետ ընդհանրապես»,- հայտարարել է քաղաքագետը։