Ադրբեջանի ԱԳՆ-ն կտրուկ քննադատել է Ֆրանսիային՝ Հայաստանին «Bastion» զրահամեքենա մատակարարելու համար

«Մենք խստորեն դատապարտում ենք Ֆրանսիայի կողմից «Bastion» հարձակողական զրահամեքենայի ուղարկումը Հայաստան։

Ինչպես հաղորդում է Caliber.Az-ը, այս մասին ասել է ԱԳՆ մամուլի քարտուղար Այխան Հաջիզադեն՝ պատասխանելով Ֆրանսիայի կողմից Հայաստանին զենքի մատակարարման վերաբերյալ հարցին:

«Վերոնշյալ զինտեխնիկայի փոխանցումը կծառայի Հայաստանի ռազմական ներուժի և ապակառուցողական գործունեության ամրապնդմանը, որը շուրջ 30 տարի օկուպացման տակ է պահել Ադրբեջանի Հանրապետության տարածքների մի մասը և ներկայումս չի հրաժարվում ագրեսիվ քաղաքականությունից և հռետորաբանությունից։

Ֆրանսիայի այս քայլերը, որը իրեն ներկայացնում է որպես միջազգային իրավունքի քարոզիչ և տարածաշրջանում խաղաղության ու կայունության ջատագով, լրջորեն կասկածի տակ են դնում տարածաշրջանում հարաբերությունները կարգավորելու նրա ջանքերը՝ պետությունների ինքնիշխանության, տարածքային ամբողջականության և միջազգային սահմանների փոխադարձ ճանաչման և հարգման հիման վրա և ծառայում են իրավիճակի սրմանը։

Ադրբեջանի դեմ Ֆրանսիայի զրպարտչական արշավի և տարածաշրջանում ապակառուցողական գործողությունների ֆոնին Հայաստանի ռազմականացման քաղաքականությանը ծառայող այս քայլերը վկայում են այն մասին, որ Ֆրանսիան առաջնորդվում է տարածաշրջանում սխալ շահերով։

Հայաստանն ու Ֆրանսիան պետք է վերջ տան տարածաշրջանի ռազմականացման քաղաքականությանը, այս երկրները պետք է վերջապես հասկանան, որ տարածաշրջանում խաղաղությունն ու համագործակցությունն այլընտրանք չունեն։

Կոչ ենք անում միջազգային հանրությանը զերծ մնալ իր ագրեսիվ քաղաքականությամբ հայտնի Հայաստանին զինելուց, դադարեցնել և դատապարտել նման ոչ լեգիտիմ գործողությունները, որոնք խոչընդոտում են տարածաշրջանում խաղաղության և բարգավաճման հաստատմանը»,- նշել է Հաջիզադեն։