Նախագահ. Ադրբեջանն ու Թուրքիան միշտ միասին են եղել թե ուրախ, թե տխուր օրերին

Ադրբեջանն ու Թուրքիան թե ուրախ, թե տխուր օրերին միշտ միասին են եղել։ Այսուհետ էլ այդպես է լինելու:

Այս մասին, ըստ «Ազերթաջ»-ի, հայտարարել է Ադրբեջանի նախագահ Իլհամ Ալիևը Անկարայում ընթացող Թյուրքական պետությունների կազմակերպության արտահերթ գագաթնաժողովում։

«Ղարաբաղյան երկրորդ պատերազմի առաջին ժամերից մինչև վերջին օրը նախագահ Ռեջեփ Թայիբ Էրդողանի կողմից Ադրբեջանին ցուցաբերած քաղաքական, դիվանագիտական և բարոյական աջակցությունը մեզ լրացուցիչ ուժ տվեց։ Միաժամանակ 44-օրյա պատերազմի ժամանակ ողջ թուրք ժողովուրդը Ադրբեջանի կողքին էր։ Թուրքիայից հազարավոր աջակցության և շնորհավորական ուղերձներ ստացանք պատերազմի ժամանակ և մեր պատմական Հաղթանակից հետո»,- ընդգծել է պետության ղեկավարը։

Նախագահը նշել է, որ 2021 թվականի հունիսին Շուշա քաղաքում ստորագրելով Շուշայի հռչակագիրը՝ Ադրբեջանի և Թուրքիայի միջև կապերը պաշտոնապես բարձրացան դաշնակցային մակարդակի։