«Ադրբեջանը հասել է լիակատար տնտեսական անկախության»
Ալիևը՝ ԵԱՏՄ գագաթնաժողովում

Տարեգրություն  26 Մայիսի 2023 - 09:02

Եվրազեսի երկրների հետ ապրանքաշրջանառությունը 2022 թվականին աճել է 31%-ով և կազմել 4,7 մլրդ դոլար։ Այս տարվա սկզբից (հունվար-ապրիլ) այն աճել է ևս 38%-ով։ Եվրազեսի երկրների մասնաբաժինը Ադրբեջանի արտաքին առևտրաշրջանառության մեջ 2022 թվականին կազմել է մոտ 9 տոկոս։ Մենք մեծ ներուժ ենք տեսնում առևտրաշրջանառության հետագա աճի համար։

Caliber.Az-ի փոխանցմամբ՝ այս մասին ասել է Ադրբեջանի նախագահ Իլհամ Ալիևը՝ Մոսկվայում Եվրասիական բարձրագույն տնտեսական խորհրդի նիստում ունեցած ելույթի ժամանակ։

«Ադրբեջանի տնտեսությունը անկախության գրեթե ողջ ընթացքում ցուցաբերել է աճ և կայունություն։ Մենք հասել ենք լիակատար տնտեսական անկախության, ինչը կարևոր գործոն է անկախ քաղաքական կուրս վարելու հնարավորության համար, ինչը մենք հաջողությամբ անում ենք։ Շուրջ 4 տարի Ադրբեջանը հաջողությամբ նախագահում է Չմիավորման շարժում կազմակերպությունում, որը միավորում է 120 պետություն՝ այդ ցուցանիշով լինելով երկրորդ միջազգային կառույցը ՄԱԿ-ից հետո։ Ադրբեջանի տնտեսությունն ինքնաբավ է և արտաքին աջակցության կարիք չունի, համախառն ներքին արդյունքը վերջին 20 տարում աճել է ավելի քան 3 անգամ, աղքատության մակարդակը նվազել է գրեթե 50-ից մինչև 5%-ի, արտաքին պարտքը կազմում է ՀՆԱ-ի 9-ից էլ քիչ և տարեցտարի նվազում է, արժութային պահուստները 10 անգամ գերազանցում են արտաքին պարտքը։

Այսօր հիմնական խնդիրներից մեկը մեր արտահանման դիվերսիֆիկացումն է։ Ինչ վերաբերում է տնտեսության դիվերսիֆիկացմանը, ապա այս հարցը հաջողությամբ լուծվում է, և Ադրբեջանի տնտեսության մեծ մասն արդեն ձևավորվում է ոչ հումքային հատվածում։ Մենք դեռ պետք է ակտիվ աշխատենք ոչ հումքային հատվածի արտահանումն ավելացնելու ուղղությամբ։

Թեև գործազրկության մակարդակը կազմում է ընդամենը 5%, ժողովրդագրական աճը՝ վերջին 30 տարում Ադրբեջանի բնակչությունը 7-ից դարձել է 10 միլիոն, պահանջում է ակտիվ ջանքեր նոր աշխատատեղեր ստեղծելու համար, և մենք մտադիր ենք ակտիվորեն ամրապնդել մեր համագործակցությունը Եվրասիական տնտեսական խորհրդի անդամ երկրների հետ, ինչը մենք արդեն հաջողությամբ անում ենք ինչպես երկկողմ, այնպես էլ բազմակողմ ձևաչափերով»,- ասել է նախագահ Իլհամ Ալիևը։

Caliber.Az

Դիտումներ: 39