Էներգետիկ համագործակցություն. Բաքուն և Բելգրադը համաձայնագրի ստորագրման շեմին են

Սերբիան ակնկալում է մոտ ապագայում Ադրբեջանի հետ համագործակցության հուշագիր ստորագրել՝ սերբական Նիշ քաղաքի մոտակայքում գազային էլեկտրակայանի կառուցման վերաբերյալ։
 
Ըստ Report-ի՝ այս մասին հայտարարել է Սերբիայի հանքարդյունաբերության և էներգետիկայի նախարար Դուբրավկա Ջեդովիչ Հանդանովիչը՝ Բելգրադում Ադրբեջանի  տնտեսության փոխնախարար Անար Ախունդովի և Ադրբեջանի Պետական ​​նավթային ընկերության (SOCAR) պատվիրակության հետ հանդիպմանը։
 
«Ջեդովիչ Հանդանովիչը հայտարարել է, որ Նիշի մերձակայքում գազային էլեկտրակայանի կառուցումը ռազմավարական նշանակություն ունի Սերբիայի համար՝ հույս հայտնելով, որ մոտ ապագայում այդ նախագծի  վերաբերյալ ադրբեջանական կողմի հետ համագործակցության հուշագիր կստորագրվի», - ասված է՝ Սերբիայի հանքարդյունաբերության և էներգետիկայի նախարարության մամուլի ծառայության հաղորդագրության մեջ։
 
Նախարարն ընդգծել է, որ նախագիծը կարևոր է Սերբիային էլեկտրաէներգիա ապահովելու և մատակարարումների հուսալիության բարձրացման տեսանկյունից և թույլ կտա երկու երկրներին՝ ամրապնդել ռազմավարական գործընկերությունը գազամատակարարման ոլորտում, որը մեկնարկել է 2023 թվականին։
 
Նա հայտարարել է, որ այս էլեկտրակայանի կառուցումը՝ Էներգետիկ զարգացման նոր ռազմավարության և Սերբիայի Էներգետիկայի ու կլիմայի ինտեգրված ազգային պլանի առաջնահերթ ծրագրերից է և քննարկվել է երկու երկրների նախագահների հանդիպումների ժամանակ։