S&P-ն հաստատել է Ադրբեջանի սուվերեն վարկանիշը «BB+/B» մակարդակում

S&P Global Ratings միջազգային վարկանիշային գործակալությունը հաստատել է Ադրբեջանի երկարաժամկետ և կարճաժամկետ սուվերեն վարկային վարկանիշները արտարժույթով և ազգային արժույթով «BB+/B» մակարդակում՝ կայուն կանխատեսմամբ։

Ինչպես տեղեկացնում է Report-ը՝ վկայակոչելով S&P-ին, «կայուն» կանխատեսումն արտացոլում է այն ակնկալիքները, որ ածխաջրածինների բարենպաստ գները կաջակցեն հաջորդ տարի Ադրբեջանի ֆինանսական վիճակին և վճարային հաշվեկշռին՝ չնայած նավթի արդյունահանման կանխատեսվող միջնաժամկետ անկմանը:

«Մենք կարող ենք դիտարկել վարկանիշի բարձրացումը, եթե Ադրբեջանը ավելի երկար պահպանի արտաքին ավելցուկը, քան մենք ակնկալում ենք, ինչը կհանգեցնի արտաքին ակտիվների զգալի լրացուցիչ կուտակման»,- ասվում է զեկույցում։

«Կառավարությունը զգալի լիկվիդային ակտիվներ է կուտակել՝ հիմնականում Ադրբեջանի Պետական նավթային հիմնադրամից (SOFAZ)... Բացի այդ, նավթի բարենպաստ գները նույնպես պետք է աջակցեն Ադրբեջանի բյուջեի կատարմանը և վճարային հաշվեկշռին:

Դրանով հանդերձ, Ադրբեջանի տնտեսությունը շարունակում է կենտրոնացված մնալ նավթագազային ոլորտում, որին բաժին է ընկնում երկրի անվանական ՀՆԱ-ի մոտ 50%-ը»,- նշում է S&P-ը։