Թուրքիայում ադրբեջանական թաղամասում ավարտվել է 1323 բնակարանի շինարարությունը

Ադրբեջանական թաղամասում, որը կառուցվում է Թուրքիայի Քահրամանմարաշ քաղաքի Օնիքիշուբաթ թաղամասում, արդեն ավարտվել է 1323 բնակարանի շինարարությունը, որոնց տերերը շուտով կստանան դրանց բանալիները։

Caliber.Az-ի փոխանցմամբ՝ այս մասին հայտնում է Haber Global հեռուստաալիքը։

Ըստ տեղեկատվության՝ թաղամասի շենքերը տարբերվում են այլ վայրերի բնակելի շենքերից, քանի որ տարածքը գտնվում է սեյսմիկ գոտում։ 1,8 մլն քառակուսի մետր ընդհանուր մակերես ունեցող ադրբեջանական թաղամասում կգործեն նաև հանրային սննդի և առևտրի օբյեկտներ։

Հեռուստաալիքի եթերում հատուկ ուշադրություն է դարձվել Ադրբեջանի կառավարության կողմից Քահրամանմարաշում կառուցված Հեյդար Ալիևի անվան դպրոցին։

Հեռուստաալիքը լայն լսարանին տեղեկացրել է 2023 թվականի փետրվարին Թուրքիայում տեղի ունեցած ավերիչ երկրաշարժերի ֆոնին Ադրբեջանի ցուցաբերած աջակցության մասին։

«Ադրբեջանը դարձավ առաջին երկիրը, որը օգնության ձեռք մեկնեց Թուրքիային զանգվածային աղետի ֆոնին։ Ադրբեջանի փրկարարներն օտարերկրյա բրիգադներից վերջինն են լքել երկրաշարժից տուժած նահանգները»,- նշել է հեռուստաալիքի թղթակից Մուրադ Քարաթաշը։