Իլհամ Ալիևը մասնակցել է Գույքային հարցերով պետական ծառայության նոր վարչական շենքի բացմանը ԼՈՒՍԱՆԿԱՐ

Բաքվում շահագործման է հանձնվել Էկոնոմիկայի նախարարությանը կից Գույքային հարցերով պետական ծառայության նոր վարչական շենքը։

Ըստ «Ազերթաջ»-ի՝ նոր շենքի բացմանը մասնակցել է Ադրբեջանի Հանրապետության նախագահ Իլհամ Ալիևը։

Նշենք, որ մայրաքաղաքում վերջին տարիներին մոդեռն ոճով կառուցված բազմահարկ շենքերի թիվն ավելացել է մեկով։ Հեյդար Ալիևի պողոտայում կառուցված նոր շենքը ուշադրություն է գրավում նաև ժամանակակից ճարտարապետությամբ:

Էկոնոմիկայի նախարար Միքայիլ Ջաբբարովը շենքի մասին տեղեկացրել է երկրի ղեկավարին։

Նշվել է, որ շենքը նախագծված է ժամանակակից և պոստմոդեռն ոճով և ունի բարդ կառուցվածք։ 33 հարկանի շենքի բարձրությունը 125 մետր է։ Շենքը դիմացկուն է 9 բալանոց երկրաշարժի դեպքում: Շենքի ճակատային մասը ստեղծում է 90 աստիճան ոլորման էֆեկտ։