Ի.Ալիև. Ադրբեջանը միանում է Խաղաղության խորհրդին, կիսելով նրա ազնիվ առաքելությունը

Ադրբեջանի նախագահ Իլհամ Ալիևը ուղերձ է հղել ԱՄՆ նախագահ Դոնալդ Թրամփին։
 
ԱզերԹաջի հաղորդմամբ՝ ուղերձում ասվում է.
 
«Հարգելի պարոն նախագահ,
 
Շնորհակալություն եմ հայտնում՝ Ադրբեջանի Հանրապետությանը Խաղաղության խորհրդին որպես հիմնադիր երկիր միանալու հրավեր ուղարկելու Ձեր ուղերձի համար։
 
Ես ընդունում եմ այս հրավերը՝ որպես փոխադարձ հարգանքի վրա հիմնված՝ Ադրբեջանի Հանրապետության և Ամերիկայի Միացյալ Նահանգների միջև փոխշահավետ գործընկերության նշան, ինչպես նաև՝ որպես տարածաշրջանային և համաշխարհային մակարդակներում խաղաղության և կայունության խթանման գործում Ադրբեջանի դերի ճանաչում։

Ադրբեջանի Հանրապետությունը միանում է Խաղաղության խորհրդին՝ կիսելով նրա ազնիվ առաքելությունը՝ վերջ դնել Գազայի հատվածում հակամարտությանը և կառուցել ավելի անվտանգ և բարգավաճ ապագա այս երկարատև հակամարտությունից տուժած բոլորի համար։
 
Հավատում եմ, որ Խաղաղության խորհուրդը կդառնա արդյունավետ միջազգային կազմակերպություն և հաջողությամբ կկատարի իր առաքելությունը։
 
Անկեղծ երախտագիտությունն եմ հայտնում Ձեզ՝ Ձեր հեռատես առաջնորդության և խաղաղությունն ամրապնդելու ջանքերի համար։ Մաղթում եմ Ձեզ հաջողություններ՝ Խաղաղության խորհրդի նախագահի պաշտոնում պարտականությունների կատարման մեջ։