Ալիև. Այսօրվա աշխարհում ռազմական հզորությունը անկախության գլխավոր գործոնն է ԼՈՒՍԱՆԿԱՐ

Գաբալայում ընթանում է Թյուրքական պետությունների կազմակերպության (ԹՊԿ) պետությունների ղեկավարների խորհրդի 12-րդ գագաթնաժողովը։

AZERTAC-ի փոխանցմամբ՝ միջոցառմանը ելույթ է ունեցել Ադրբեջանի Հանրապետության նախագահ Իլհամ Ալիևը։

Նախագահ Իլհամ Ալիևի ելույթը.

«Այսօր Թյուրքական պետությունների կազմակերպությունը միայն համագործակցության հարթակ չէ, այն ձևավորվում է որպես խոշոր աշխարհաքաղաքական կենտրոն։ Մեր կազմակերպության աճող միջազգային հեղինակությունը գոհունակություն է առաջացնում։ Մեր ընդհանուր պատմական և էթնիկ արմատները, մեր ընդհանուր ազգային և հոգևոր արժեքները մեզ միավորում են որպես մեկ ընտանիք»։

Կազմակերպության գործունեությունն աջակցելու համար մեր երկիրը Քարտուղարության հաշվին փոխանցել է 2 միլիոն դոլար։

Ներքին քաղաքական և տնտեսական կայունությունը, կարևոր աշխարհաքաղաքական դիրքը, դրական ժողովրդագրական վիճակը և երիտասարդ բնակչությունը, տրանսպորտի և լոգիստիկայի ոլորտում մեծ հնարավորությունները, բնական պաշարները, ինչպես նաև աճող ռազմական և ռազմատեխնիկական ներուժը ԹՊԿ-ն դարձնում են համաշխարհային ասպարեզում նշանակալի խաղացող։

Այսօր խաղաղությունն ու անվտանգությունը ցանկացած երկրի զարգացման հիմնական գործոններն են։

Նախչըվանի համաձայնագիրը, որը մեր կազմակերպության հիմնադիր փաստաթուղթն է, խաղաղության և անվտանգության պահպանումը դասում է իր հիմնական նպատակների և խնդիրների շարքում: Աշխարհի առջև ծառացած ժամանակակից աշխարհաքաղաքական և անվտանգության մարտահրավերների ֆոնին, կարևոր է, որ թյուրքական պետությունները, համաձայն անցյալ տարի Շուշայում կայացած ոչ պաշտոնական գագաթնաժողովում ընդունված Ղարաբաղյան հռչակագրի և այսօրվա գագաթնաժողովի «Տարածաշրջանային խաղաղություն և անվտանգություն» թեմայի, գործեն որպես միասնական ուժի կենտրոն։

Հայտնի է, որ զարգացումն անհնար է առանց անվտանգության ապահովման: Այն ժամանակ, երբ միջազգային իրավունքի նորմերն ու սկզբունքները կոպտորեն խախտվում են, մեր երկրների միջև ռազմական և ռազմատեխնիկական ոլորտներում համագործակցությունը կարևոր գործոն է: Այս համատեքստում մեր դաշնակից Թուրքիայի հետ հաստատվել է խորը համագործակցություն: Միայն վերջին մեկ տարվա ընթացքում Թուրքիայի հետ անցկացվել է ավելի քան 25 երկկողմ և բազմազգ ռազմական վարժանքներ։

Հաշվի առնելով մեր երկրների միջև ռազմական, պաշտպանական և անվտանգության ոլորտում լայն համագործակցությունը, առաջարկում եմ 2026 թվականին Ադրբեջանում անցկացնել Թյուրքական պետությունների կազմակերպության անդամ պետությունների համատեղ ռազմական վարժանքներ։

Ժամանակակից աշխարհում ռազմական հզորությունը ցանկացած երկրի անկախության և տարածքային ամբողջականության հիմնական գործոնն է։

2020 թվականին 44-օրյա Հայրենական պատերազմում մեր պատմական հաղթանակի և 2023 թվականին ձեռնարկված վճռական հակաահաբեկչական միջոցառումների արդյունքում վերջ դրվեց ադրբեջանական հողերի 30-ամյա օկուպացիային։ Այսպիսով, վերականգնվեց մեր երկրի տարածքային ամբողջականությունը և նրա ինքնիշխանությունը մեր նախնիների հողերի նկատմամբ։ Այս պատմական նվաճումը ոչ միայն Ադրբեջանի ազգային կամքի և վճռական պայքարի հաղթանակն է, այլև նշանակալի ներդրում տարածաշրջանում արդարության, խաղաղության և կայունության հաստատման գործում»։