Ալիև. Հայաստանն իրեն զրկել է Ադրբեջանի էներգետիկ ռեսուրսների համար կարևոր տարանցիկ երկիր դառնալու հնարավորությունից

Ցավոք, հայերի կողմից ադրբեջանական հողերի օկուպացիան թույլ չտվեց Հարավային Կովկասին զարգանալ որպես քիչ թե շատ ինտեգրված տարածաշրջան։ Մենք բոլոր հնարավորություններն ունեինք դա անելու:

Ինչպես հաղորդում է AZERTAC-ը, այս մասին նախագահ Իլհամ Ալիևը հայտարարել է ADA համալսարանում ընթացող «Դեպի նոր աշխարհակարգ» միջազգային ֆորումի ժամանակ։

«Սակայն ագրեսիան, ավերածություններն ու ադրբեջանական ժողովրդի տառապանքը թույլ չտվեցին, որ դա տեղի ունենա: Հարավային Կովկասը չինտեգրվեց, թեև տնտեսական տեսանկյունից, տրանսպորտային ուղիների և, իհարկե, էներգետիկ անվտանգության տեսանկյունից, դա կարող էր տեղի ունենալ: Ադրբեջանի և Վրաստանի միջև հարաբերությունները վառ օրինակ են այն բանի, ինչի մասին ես նշեցի՝ էներգետիկ անվտանգություն, տրանսպորտ, քաղաքական երկխոսություն, ներդրումներ, տնտեսական առավելություններ: Հայաստանը, փաստորեն, իրեն զրկել է այս ամենից: Ըստ էության, օկուպացիայի և ագրեսիայի արդյունքում Հայաստանը զրկել է իրեն Ադրբեջանի էներգետիկ ռեսուրսների և տրանսպորտային ուղիների համար կարևոր տարանցիկ երկիր դառնալու հնարավորությունից»,- նշել է պետության ղեկավարը։