Ալիև. Մենք լիովին վճռական ենք ընդլայնել մեր համագործակցությունը եղբայրական Ուզբեկստանի հետ

Ադրբեջանի նախագահ Իլհամ Ալիևը շնորհավորական ուղերձ է հղել՝ իր ուզբեկ գործընկեր Շավքաթ Միրզիյոևին։

Ինչպես հաղորդում է AZERTAC-ը, ուղերձում ասվում է.

«Հարգելի Շավքաթ Միրոմոնովիչ,

Հարգելի եղբայր,

Իմ անունից և Ադրբեջանի ժողովրդի անունից Ձեզ և Ձեր ողջ ժողովրդին եմ հղում ամենաջերմ շնորհավորանքներն ու բարեմաղթանքները՝ եղբայրական Ուզբեկստանի Հանրապետության ազգային տոնի՝ Անկախության օրվա կապակցությամբ։

Որպես եղբայրական երկիր՝ մենք ուրախ ենք, որ այսօր ականատես ենք լինում Ձեր երկրի արագ և համապարփակ զարգացմանը՝ հիմնված Ձեր կողմից սահմանված Ուզբեկստանի նոր ռազմավարության վրա, նրա առաջընթացին բոլոր ոլորտներում, տնտեսական հզորության աճին, հեղինակության և դիրքերի ամրապնդմանը համաշխարհային ասպարեզում։

Ադրբեջանա-ուզբեկական հարաբերությունները հստակ արտացոլում են մեր ժողովուրդների միջև ձևավորված եղբայրական հարաբերությունների լավ ավանդույթները, որոնք կիսում են ընդհանուր պատմություն, լեզու և մշակույթ։

Մենք լիովին վճռական ենք համատեղ ջանքերով ընդլայնել մեր համագործակցությունը եղբայրական Ուզբեկստանի հետ։

Վստահ եմ, որ ադրբեջանա-ուզբեկական եղբայրությունը կշարունակի կարևոր դեր խաղալ բոլոր համատեղ նախաձեռնությունների իրականացման գործում, կծառայի մեր երկրների զարգացմանը, երկու ժողովուրդների բարեկեցությանը։

Հարգելի Շավքաթ Միրոմոնովիչ,

Այս  նշանակալի օրը կրկին անկեղծորեն շնորհավորում եմ Ձեզ, մաղթում եմ առողջություն, երջանկություն, հաջողություններ Ձեր պատվավոր և պատասխանատու աշխատանքում, Ուզբեկստանի եղբայրական ժողովրդին՝ մշտական խաղաղություն, բարեկեցություն և բարգավաճում։