Ալիևը հանդիպել է Բրազիլիայի փոխնախագահի հետ

Նոյեմբերի 14-ին Ադրբեջանի Հանրապետության նախագահ Իլհամ Ալիևը հանդիպել է Բրազիլիայի Դաշնային Հանրապետության փոխնախագահ Ժերալդու Ալկմինի հետ։

AZERTAC-ի փոխանցմամբ՝ Ժերալդու Ալկմինը պետության ղեկավարին է փոխանցել Բրազիլիայի նախագահի ողջույնը՝ նշելով, որ Լուիս Ինասիո Լուլա դա Սիլվան առողջական պատճառներով չի կարողացել մասնակցել COP29-ին։

Երկրի ղեկավարը շնորհակալություն է հայտնել ողջույնի համար, խնդրել է իր ողջույնը փոխանցել Բրազիլիայի նախագահին, Լուիս Ինասիո Լուլա դա Սիլվային մաղթել է շուտափույթ ապաքինում։ Նախագահ Իլհամ Ալիևը Բրազիլիայի պետության ղեկավարին հրավիրել է պաշտոնական այց կատարել Ադրբեջան։

Հյուրը նշել է, որ Բաքվի գեղեցկությունը հաճելի տպավորություն է թողել իրենց վրա, նա շնորհավորել է կազմակերպվածության բարձր մակարդակի և COP29-ի հաջող անցկացման կապակցությամբ։

Ժերալդու Ալկմինն անդրադարձել է COP «եռյակի» շրջանակներում Ադրբեջանի և Բրազիլիայի միջև համագործակցությանը և կլիմայի փոփոխության հարցերին։ Նա ասել է, որ իր երկիրը մեծ նշանակություն է տալիս Ադրբեջանի հետ երկկողմ հարաբերությունների զարգացմանը, մասնավորապես՝ առևտրատնտեսական, գյուղատնտեսության և ներդրումային ոլորտներում։