«COP29-ը վճռորոշ միջոցառում է կլիմայի վերաբերյալ միջազգային բանակցությունների համար» Շոտլանդիայի խորհրդարանի բանաձևը

Շոտլանդիայի խորհրդարանը բանաձև է ընդունել «COP29. խաղաղապահ ջանքերը և հրադադարի նախաձեռնությունը» վերնագրով:

Ինչպես հաղորդում է Caliber.Az-ը, խորհրդարանի պաշտոնական կայքում զետեղված բանաձևում ընդգծվում է, որ COP29-ը նշանակալի իրադարձություն է ողջ աշխարհի, պետությունների, այդ թվում՝ Ադրբեջանի և Հայաստանի միջև միջազգային համագործակցության զարգացման համար։ Փաստաթղթում նշվում է, որ COP29-ում կլիմայական գործողությունները կարող են որպես կամուրջ ծառայել երկրների միջև, որը տանում է դեպի խաղաղություն և համագործակցություն:

Բանաձևում նաև աջակցություն է հայտնվել հրադադարի նախաձեռնությանը, որը կոչ է անում բոլոր կողմերին, որոնք ներգրավված են աշխարհում շարունակվող հակամարտությունների մեջ, դադարեցնել ռազմական գործողությունները:

Բանաձևում ընդգծվում է, որ COP29-ը վճռորոշ միջոցառում է կլիմայի վերաբերյալ միջազգային բանակցությունների համար և կոչ է անում բոլոր մասնակիցներին համագործակցել կլիմայական ճգնաժամի դեմ հիմնովին պայքարելու գործում։