«Ռուսական հետք». Ադրբեջանը բողոքում է անարդար ծովային պատժամիջոցների դեմ ՊԱՇՏՈՆԱԿԱՆ

2025 թվականին միջազգային պատժամիջոցներ են կիրառվել «Ադրբեջանի Կասպյան ծովային նավագնացություն» ընկերությանը (ASCO) պատկանող հինգ նավերի նկատմամբ՝ ռուսական ծագում ունեցող հում նավթ փոխադրելու մեղադրանքով։

Caliber.Az-ի փոխանցմամբ՝ այս մասին ասվում է «Ադրբեջանի Կասպյան ծովային նավագնացություն» ընկերության (Azerbaijan Caspian Shipping Closed Joint-Stock Company - ASCO) 2025 թվականի գործունեության վերաբերյալ զեկույցում, որը հրապարակվել է ընկերության կողմից։

Նշվում է, որ երկու նավ անմիջականորեն պատկանում է ASCO-ին, իսկ երեքը՝ համատեղ սեփականության իրավունքով պատկանում են նրա դուստր համատեղ ձեռնարկության՝ SA Maritime AFZECO-ին։

Դրանք բոլորը ներառվել են Եվրամիության, Միացյալ Թագավորության և Կանադայի կողմից սահմանված պատժամիջոցների ցուցակներում։ Սա վնասել է ASCO-ի գործունեությանը և ֆինանսական շահերին։

ASCO-ի ղեկավարությունը, չհամաձայնվելով այս որոշման հետ, դատական գործընթաց է սկսել՝ բողոքարկում ներկայացնելով, պնդելով, որ ո՛չ ընկերությունը, ո՛չ էլ նրա համատեղ ձեռնարկությունը չեն խախտել համապատասխան պատժամիջոցների պահանջները։ Գործը ներկայումս ընթացքի մեջ է, և դժվար է գնահատել դատական ատյանների կողմից որոշում կայացնելու կոնկրետ ժամկետը։

ASCO-ն հետևում է իրավիճակին և պատրաստ է հետագայում էլ ձեռնարկել բոլոր հնարավոր իրավական և այլ միջոցները՝ իր օրինական իրավունքներն ու շահերը պաշտպանելու համար։