Հայտնի են դարձել ադրբեջանցիների համար ամենամահացու հիվանդությունները

Սրտանոթային հիվանդությունները մահվան ամենամեծ ռիսկն են ներկայացնում Ադրբեջանի քաղաքացիների համար։

Ինչպես հաղորդում է Caliber.Az-ը, այս մասին հայտարարել է Ադրբեջանի Պարտադիր բժշկական ապահովագրության պետական գործակալության խորհրդի նախագահ Զաուր Ալիևը 2025 թվականի արդյունքներին նվիրված մամուլի ասուլիսում։

Նրա խոսքով՝ այդ պատճառով 2026 թվականին բարձր արյան ճնշման (հիպերտոնիայի) համար դեղերի արժեքը նախատեսվում է ծածկել Պարտադիր բժշկական ապահովագրության գծով։

«Առաջին փուլում սա կվերաբերի 76 դեղամիջոցի։ Ընդհանուր առմամբ, պարտադիր բժշկական ապահովագրության փաթեթը այս տարի կընդլայնվի, այդ թվում՝ վնասվածքաբանության, առաջին պրոթեզի նորով փոխարինման, նյարդավիրաբուժության, ակնաբուժության, սրտաբանության և սրտի վիրաբուժության ոլորտներում», - նշել է Զաուր Ալիևը։