Էմրելի. Աշխարհը կրկին կտեսնի, որ «Ղարաբաղ» անվան կողքին գրված կլինի՝ Ադրբեջան

Գերմանական «Կայզերսլաուտերն» ակումբի ֆուտբոլիստ Մահիր Էմրելին Azeriport.com կայքին մեկնաբանել է Աղդամի թիմի դուրս գալը Չեմպիոնների լիգայի հիմնական փուլ։

 «Շնորհավորում եմ թիմին Չեմպիոնների լիգա դուրս գալու կապակցությամբ։ Հեռուստացույցի առջև տարբեր հույզեր ապրեցի։ Ուրախ էի թիմի հաղթանակով, բայց նաև հուզվեցի, երբ տեսա «Ղարաբաղի» մարզիչների և խաղացողների հույզերը։ Կար նաև դեժավյուի զգացողություն, այս խաղը ինձ տարավ 2017 թվականի օգոստոս, երբ մենք առաջին անգամ հասանք նման մեծ մրցաշարի գլխավոր փուլ։ «Ղարաբաղը» կրկին կխաղա Եվրոպայի լավագույն ակումբների հետ։ Ցավոք, վիճակահանությամբ գերմանական ակումբի հետ արտագնա խաղ չեղավ, կցանկանայի ներկա լինել նման խաղի։

Այս ամենի գլխավոր «մեղավորը» Գուրբան Գուրբանովն է։ Նրա հույզերը շատ բան են ասում, թե որքան շատ էր նա ուզում դա և արժանիորեն ստացավ։ Անկախ նրանից, թե ինչպես է թիմը հանդես գալու դրանից հետո, Աղդամի թիմն արդեն շատ բանի է հասել», - ասել է Էմրելին։