Հայ դահուկորդը տուգանվել է «Ադրբեջան» գրությունը ծածկելու համար

,Դահուկասպորտի և սնոուբորդի միջազգային ֆեդերացիան (FIS) կարգապահական պատժամիջոցներ է կիրառել հայ մարզիկ Միքայել Միքայելյանի նկատմամբ Tour de Ski բազմօրյա մրցաշարի ընթացքում։ Տուգանքի պատճառը դարձել է այն, որ դահուկորդը կպչուն ժապավենով ծածկել է իր մրցումային հագուստի վրա գտնվող «Ադրբեջան» գրությունը, որը հանդիսանում է մրցաշարի պաշտոնական հովանավորի բրենդը։

Ինչպես գրում է «Sputnik Արմենիա»-ն, FIS-ը չի հրապարակել դրամական տուգանքի չափը։ Ինքը՝ Միքայելյանը, նույնպես հրաժարվել է մեկնաբանել իր քայլի շարժառիթները։

Միջադեպը տեղի է ունեցել մրցաշարի փուլերից մեկի ժամանակ՝ Իտալիայի Տոբլախ քաղաքում։ Tour de Ski-ի ընթացքում Ադրբեջանի հովանավորական խորհրդանիշը՝ լոգոտիպերը տեղադրված էին ոչ միայն մարզիկների հանդերձանքի վրա, այլև մրցուղու երկայնքով տեղակայված բազմաթիվ գովազդային վահանակների վրա։

Հիշեցնենք, որ նախորդ տարվա մայիսին FIS-ը հինգ տարվա հովանավորական պայմանագիր է կնքել Ադրբեջանի Պետական զբոսաշրջության գործակալության հետ։