Իլհամ Ալիևն ու Լյու Ցզյանչաոն քննարկել են առևտրատնտեսական կապերի ընդլայնումը

Ապրիլի 2-ին Ադրբեջանի նախագահ Իլհամ Ալիևն ընդունել է Չինաստանի Կոմկուսի Կենտրոնական կոմիտեի անդամ, Միջազգային հարաբերությունների բաժնի ղեկավար Լյու Ցզյանչաոյին։

Ինչպես հայտնում է Caliber.Az-ը, այս մասին տեղեկությունը զետեղված է պետության ղեկավարի պաշտոնական կայքում։

Իլհամ Ալիևը վստահություն է հայտնել Ադրբեջանի և Չինաստանի միջև հարաբերությունների հետագա հաջող զարգացման հարցում՝ ընդգծելով, որ քաղաքական, տնտեսական և տրանսպորտային ոլորտներում առկա համագործակցությունը նպաստում է տարածաշրջանում բազմակողմ փոխագործակցության և անվտանգության ամրապնդմանը։

Լյու Ցզյանչաոն Իլհամ Ալիևին է փոխանցել Չինաստանի Ժողովրդական Հանրապետության նախագահ Սի Ծինփինի ողջույնն ու բարեմաղթանքները։ Իլհամ Ալիևը շնորհակալություն է հայտնել և պատասխան ողջույն փոխանցել Սի Ծինփինին։

Հանդիպմանը քննարկվել են առևտրատնտեսական կապերի ընդլայնման, վերականգնվող էներգետիկայի ոլորտում համագործակցության հարցեր «Միջին միջանցք» և «Մեկ գոտի, մեկ ճանապարհ» նախագծերի շրջանակներում։ Մտքերի փոխանակություն է տեղի ունեցել նաև «Նոր Ադրբեջան» կուսակցության և Չինաստանի Կոմունիստական կուսակցության միջև հարաբերությունների զարգացման շուրջ։