Մատվիենկոն՝ Ալիևային. Հուսով եմ՝ ՌԴ և Ադրբեջանի միջև փոխշահավետ հարաբերությունները կզարգանան

Ռուսաստանի Դաշնային ժողովի Դաշնության խորհրդի նախագահ Վալենտինա Մատվիենկոն նամակ է հղել Ադրբեջանի առաջին փոխնախագահ Մեհրիբան Ալիևային։

Ինչպես հաղորդում է AZERTAC-ը, նամակում ասվում է.

«Ռուսաստանի Դաշնությունում Դուք հայտնի եք որպես փորձառու և իմաստուն ղեկավար, տաղանդավոր կազմակերպիչ, որը մեծ հեղինակություն է վայելում Ադրբեջանի Հանրապետության քաղաքացիների շրջանում և արտերկրում։

Անկեղծ ջերմությամբ և խորը երախտագիտությամբ հիշում եմ մեր հանդիպումները՝ լի ջերմությամբ և բարեկամական մթնոլորտով։ Հուսով եմ, որ մենք հետագայում էլ հնարավորություն կունենանք բացահայտ քննարկելու ռուս-ադրբեջանական փոխշահավետ հարաբերությունների զարգացման ուղիները, այդ թվում՝ խորհրդարանական խողովակներով, նպաստելու մեր երկրների շահերին համապատասխանող նախագծերի իրականացմանը։

Այս տոնական օրը ես կցանկանայի գնահատել Ձեր անսպառ կենսական էներգիան և իսկապես բացառիկ հմայքը, ինչպես նաև պատասխանատու պետական պաշտոնում հաջող գործունեությունը և հոգատար, սիրող կնոջ և մոր դերը համատեղելու Ձեր ունակությունը»։