Ադրբեջանի նախագահն ընդունել է Իրանի Իսլամական Խորհրդատվական խորհրդի նախագահին

Փետրվարի 20-ին Ադրբեջանի Հանրապետության նախագահ Իլհամ Ալիևն ընդունել է Իրանի Իսլամական Խորհրդատվական խորհրդի նախագահ Մոհամմադ Բաղեր Գալիբաֆի գլխավորած պատվիրակությանը։

Ինչպես հայտնում է Сaliber.Az-ը, Ադրբեջանի նախագահն ընդգծել է, որ երկու երկրների ժողովուրդներն ունեն ընդհանուր պատմական, մշակութային ու կրոնական արմատներ։

Ադրբեջանի նախագահն անդրադարձել է առևտրատնտեսական, տրանսպորտային, էներգետիկ և այլ ոլորտներում համագործակցության հարցերին։ Ընդգծելով Հյուսիս-Հարավ տրանսպորտային միջանցքի կարևորությունը՝ Իլհամ Ալիևը ասել է, որ Ադրբեջանն անհրաժեշտ աշխատանք է կատարել այդ միջանցքի ադրբեջանական հատվածով բեռնափոխադրումների հնարավորությունները մեծացնելու ուղղությամբ։ Երկրի ղեկավարը նշել է, որ ինտենսիվ աշխատանք է տարվում Աղբենդ անցակետի կառուցման ուղղությամբ, և այս նախագիծը կնպաստի տարածաշրջանի տրանսպորտային կարողությունների բարձրացմանը։

Նշելով, որ տարածաշրջանային խնդիրները պետք է լուծեն տարածաշրջանի երկրները, և որ արտատարածաշրջանային ուժերի միջամտությունը տարածաշրջան անընդունելի է, նախագահ Իլհամ Ալիևն ընդգծել է «3+3» ձևաչափի կարևորությունը։

Մոհամմադ Բաղեր Գալիբաֆը երկրի ղեկավարին է փոխանցել Իրանի Իսլամական Հանրապետության նախագահ Մասուդ Փեզեշքիանի ողջույնն ու բարեմաղթանքները։

Նախագահ Իլհամ Ալիևը շնորհակալություն է հայտնել ողջույնի համար և խնդրել  իր ողջույնը փոխանցել Մասուդ Փեզեշքիանին։

Նշելով Բաքվում Ասիական խորհրդարանական վեհաժողովի 15-րդ լիագումար նիստի կազմակերպման բարձր մակարդակը՝ հյուրը գոհունակություն է հայտնել երկու երկրների միջև այցելությունների ինտենսիվ բնույթի կապակցությամբ։