Ի.Ալիև. Ադրբեջանը մոբիլիզացրել է բոլոր ջանքերը՝ TRIPP երթուղու արագ իրականացումն ապահովելու համար

Այս տարվա օգոստոսի 8-ին Վաշինգտոնում ԱՄՆ նախագահ Դոնալդ Թրամփի ներկայությամբ՝ Ադրբեջանի և Հայաստանի միջև համատեղ հռչակագիր ստորագրվեց։ Սա հիմք դրեց «Թրամփի երթուղին միջազգային խաղաղության և բարգավաճման համար» (TRIPP) ծրագրին, որը կապահովի անխոչընդոտ կապ՝ Ադրբեջանի Հանրապետության մայրցամաքային մասի և Նախչըվանի Ինքնավար Հանրապետության միջև։
 
AZERTAC-ի փոխանցմամբ, այս մասին ասվում է նախագահ Իլհամ Ալիևի՝ «Միջին միջանցքի երկայնքով. հաղորդակցություն, ֆինանսներ և էներգետիկա» խորագրով 6-րդ Կասպիական բիզնես ֆորումի մասնակիցներին ուղղված ուղերձում։
 
Ադրբեջանի նախագահը վստահություն է հայտնել, որ TRIPP-ը, որը կդառնա Միջին միջանցքի հաջորդ խոշոր հատվածը, կծառայի որպես Ասիան և Եվրոպան կապող հիմնական տրանսպորտային օղակ՝ ընդլայնելով միջազգային բեռնափոխադրումների տարանցիկ հզորությունները և նպաստելով տարածաշրջանի երկրների բարգավաճմանը, ինչպես նաև դրանց ինտեգրմանը համաշխարհային մատակարարման շղթաներին։
 
Ուղերձում նշվեում է, որ TRIPP-ը նաև զգալի ներուժ ունի ապագա էներգապաշարների փոխադրման, էլեկտրաէներգիայի արտահանման, մասնավորապես վերականգնվող էներգիայի, և օպտիկամանրաթելային մալուխների տեղադրման համար, որոնք տարածաշրջանը կվերածեն առևտրի և թվային հաղորդակցության միջազգային  հանգույցի։
 
«Ադրբեջանը մոբիլիզացրել է բոլոր ջանքերը՝ այս երթուղու արագ իրականացումն ապահովելու համար», - ընդգծվում է ուղերձում։