Ի.Ալիևը հրամանագիր է ստորագրել 2025 թվականի ապրիլին քաղաքացիներին ժամկետային զինվորական ծառայության զորակոչելու մասին

Նախագահ Իլհամ Ալիևը հրամանագիր է ստորագրել՝ 2025 թվականի ապրիլի 1-ից մինչև ապրիլի 30-ը Ադրբեջանի քաղաքացիներին  ժամկետային զինվորական ծառայության զորակոչելու և ժամկետային զինծառայողներին պահեստ արձակելու մասին։
 
Ինչպես հայտնում է Caliber.Az-ը, այս մասին տեղեկություն է հրապարակվել ԱՀ ղեկավարի պաշտոնական կայքում։
 
Հրամանագրի համաձայն՝ 2025 թվականի ապրիլի 1-ից 30-ը՝  պարտադիր զինվորական ծառայության են զորակոչվելու՝ 2007 թվականին ծնված Ադրբեջանի Հանրապետության քաղաքացիները, որոնց 18 տարին լրացել է մինչև զորակոչի օրը (ներառյալ այդ օրը), ինչպես նաև 1995-2006 թվականներին ծնված մինչև 30 տարեկան, պարտադիր զինվորական ծառայություն չանցած, պարտադիր զինվորական ծառայության զորակոչից տարկետման իրավունք չունեցող կամ Ադրբեջանի զինված ուժերում պարտադիր զինվորական ծառայության զորակոչից չազատված անձինք:
 
2025 թվականի ապրիլի 1-ից մինչև ապրիլի 30-ը՝ «Զինվորական պարտականության և զինվորական ծառայության մասին» ԱՀ օրենքի 38.1.1 հոդվածով նախատեսված՝ ծառայության ժամկետն անցած պարտադիր զինվորական ծառայության զինծառայողները կարձակվեն պահեստ:
 
Նախարարների կաբինետին հանձնարարվել է՝ ձեռնարկել օրենքով նախատեսված միջոցներ սույն հրամանի կատարման համար։