Իլհամ Ալիև. Ադրբեջանում հաջողությամբ գործում են օտարերկրյա կապիտալով հազարավոր ընկերություններ

Ադրբեջանի նախագահ Իլհամ Ալիևը  ուղերձ է հղել՝ Առաջին Ադրբեջանական միջազգային ներդրումային ֆորումի մասնակիցներին։
 
Ինչպես հաղորդում է Caliber.Az-ը՝ հղում անելով AZERTAC-ին, իր ուղերձում նա նշել է, որ այս միջոցառումը կծառայի՝ որպես փոխշահավետ համագործակցության ամրապնդման, նոր գործընկերային կապերի հաստատման, նորարարական գաղափարների քննարկման և ներդրումների ներգրավման կարևոր հարթակ։
 
Պետության ղեկավարը հիշեցրել է, որ անկախություն ձեռք բերելուց ի վեր՝ Ադրբեջանը հատուկ նշանակություն է տվել օտարերկրյա ներդրողների հետ փոխգործակցությանը և առաջատար համաշխարհային ընկերությունների հետ համատեղ իրականացրել է՝ երկրի և տարածաշրջանի համար ռազմավարական նշանակություն ունեցող նախագծեր։
 
Նախագահը նշել է, որ սոցիալ-տնտեսական բարեփոխումները և համաշխարհային տնտեսության մեջ ինտեգրումը լայն հնարավորություններ են բացել միջազգային ընկերությունների համար։ Նա հայտնել է, որ 2004-2024 թվականներին երկրի տնտեսությունում ներդրվել է 344,4 միլիարդ դոլար, որից 213,2 միլիարդ դոլարը ուղղվել է ոչ նավթային ոլորտին։ Պետության ղեկավարի խոսքով՝ սա հստակ արտացոլում է օտարերկրյա ներդրողների վստահությունը Ադրբեջանի նկատմամբ, ինչպես նաև երկրում տիրող կայունությունն ու անվտանգությունը։
 
Նախագահը ընդգծել է, որ այսօր Ադրբեջանում հաջողությամբ գործում են արտասահմանյան կապիտալով հազարավոր ընկերություններ: Սա, նշել է նա, նպաստում է ժամանակակից կորպորատիվ կառավարման սկզբունքների վրա հիմնված մրցունակ և կայուն տնտեսության ձևավորմանը: Նա հավելել է, որ շատ արտասահմանյան ընկերություններ նախընտրում են շարունակել շահույթը վերաներդնել երկրի տնտեսությունում։
 
Նախագահը նշել է, որ երկրի տարածքային ամբողջականությունը վերականգնելուց հետո, Ադրբեջանն իր ջանքերով հիմք է դրել տարածաշրջանում երկարաժամկետ խաղաղության, կայունության և կայուն զարգացման համար: Նա հավելել է, որ այսօր երկիրը կենտրոնանում է տնտեսական դիվանագիտության, ոչ նավթային ոլորտների զարգացման և, մասնավորապես, իր զբոսաշրջային ներուժի ամրապնդման վրա։
 
Պետության ղեկավարը հայտնել է, որ 2021-2024 թվականներին ոչ նավթային ոլորտը տարեկան միջինում աճել է 6,7%-ով, իսկ տնտեսությունում դրա բաժինը հասել է 68%-ի: Նա հավելել է, որ վերջին վեց տարիների ընթացքում ոչ նավթային արտահանումը գրեթե կրկնապատկվել է, ինչը երկրի աճող մրցունակության ցուցանիշ է։
 
Նախագահը նաև նշել է, որ այս բոլոր նվաճումներին նպաստել է ժամանակակից արդյունաբերական ենթակառուցվածքների ստեղծումը. Երկրում գործում է ինը արդյունաբերական պարկ և չորս արդյունաբերական թաղամաս,  որտեղ գրանցված է 171 ձեռնարկություն, որոնցից 98-ը արդեն սկսել են արտադրությունը: Այս գոտիներում ներդրվել է ավելի քան 6,9 միլիարդ մանաթ, ստեղծվել է մոտ 11,000 մշտական ​​աշխատատեղ: