«Պահանջում ենք արդարություն և պատիժ մեղավորներին» Ալիևը՝ Ակտաուում տեղի ունեցած ավիավթարի մասին

Վստահաբար կարող եմ ասել, որ այս աղետում (ինքնաթիռի վթարը Ակտաուում - Խմբ.) Ադրբեջանի քաղաքացիների զոհվելու համար մեղավորները Ռուսաստանի Դաշնության ներկայացուցիչներն են։ Եվ մենք պահանջում ենք արդարություն, պահանջում ենք պատիժ մեղավորներին, պահանջում ենք լիարժեք թափանցիկություն և մարդկային վարքագիծ։

Ինչպես հաղորդում է AZERTAC-ը, այս մասին նախագահ Իլհամ Ալիևն ասել է ինքնաթիռի կործանման հետևանքով զոհված անձնակազմի ընտանիքի անդամների և ողջ մնացած բորտուղեկցորդների հետ հանդիպմանը։

Նշելով, որ այժմ ընթանում է սև արկղերի վերծանման գործընթացը, պետության ղեկավարն ասել է. «Վստահ եմ, որ մոտ ապագայում մենք կիմանանք նախնական արդյունքը, և ամեն ինչ իր տեղը կընկնի, հայտնի կդառնա տեղի ունեցած ողբերգության ողջ պատկերը։ Եվ սա, բնականաբար, կարևոր կետ է լինելու այս ողբերգության ամբողջական հետաքննության և դրա մեղավորների պատժման գործում»։