Ալիևը և Էրդողանը քննարկել են էներգետիկայի և տրանսպորտի ոլորտները

Սեպտեմբերի 1-ին Չինաստանի Տյանցզին քաղաքում տեղի է ունեցել՝ Ադրբեջանի նախագահ Իլհամ Ալիևի և Թուրքիայի նախագահ Ռեջեփ Թայիբ Էրդողանի հանդիպումը։
 
Caliber.Az-ի փոխանցմամբ՝ այս մասին տեղեկատվությունը տեղադրվել է Ադրբեջանի Հանրապետության ղեկավարի պաշտոնական կայքում։
 
Հանդիպմանը գոհունակություն է հայտնվել՝ եղբայրության և ռազմավարական դաշինքի վրա հիմնված երկկողմ կապերի ընդլայնման կապակցությամբ բոլոր ոլորտներում, այդ թվում՝ էներգետիկայի և տրանսպորտի։
 
Զրույցի ընթացքում անդրադարձ է կատարվել SOCAR-ի և թուրքական Botaş ընկերության միջև համագործակցությանը, նշվել է՝ Կատարի ֆինանսական աջակցությամբ Թուրքիայի միջոցով Սիրիա ադրբեջանական գազի մատակարարման կարևորությունը։ Պետությունների ղեկավարները քննարկել են՝ Ադրբեջանի և Թուրքիայի համատեղ էներգետիկ նախագծերի իրականացումը այլ երկրներում։ Ընդգծվել է Կարս-Իգդիր-Դիլուջու երկաթուղային գծի հիմնարկեքի կարևորությունը, ինչպես նաև մտքերի փոխանակում է տեղի ունեցել Ադրբեջանում, այդ թվում՝ Նախչըվանում իրականացվող երկաթուղային նախագծերի վերաբերյալ։
 
Բացի այդ, Իլհամ Ալիևը և Ռեջեփ Թայիբ Էրդողանը քննարկել են Ադրբեջանի և Հայաստանի միջև հարաբերությունների կարգավորման գործընթացը։ Մասնավորապես, բարձր է գնահատվել Թուրքիայի կայունացնող դերը տարածաշրջանային հարցերում։
 
Անդրադարձ է կատարվել Թուրքական պետությունների կազմակերպության առաջիկա գագաթնաժողովի կարևորությանը, որը տեղի կունենա այս տարի Ադրբեջանում։
 
Եզրափակելով՝ նախագահները մտքեր են փոխանակել ադրբեջանա-թուրքական ռազմավարական կապերի հեռանկարների և փոխադարձ հետաքրքրություն ներկայացնող այլ հարցերի շուրջ։