Ալիև. Մենք ուզում ենք, որ Հայաստանը երբեք կասկածի տակ չդնի մեր տարածքային ամբողջականությունը
Նախագահ Իլհամ Ալիևը Euronews հեռուստաալիքին տված հարցազրույցում պատասխանել է նաև Հայաստանի և Ադրբեջանի միջև խաղաղության հասնելու վերաբերյալ հարցին։
Ըստ AZERTAC-ի՝ պետության ղեկավարն ասել է. «Ես լավատեսորեն էի տրամադրված ժամկետների հարցում, քանի որ մենք մի քանի անգամ առաջարկություններ ենք փոխանակել Հայաստանի հետ խաղաղության պայմանագրի նախնական նախագծի վերաբերյալ, որն Ադրբեջանն ինքն է մշակել։ Դրանից հետո երկու երկրների միջև վեց անգամ մեկնաբանություններ են փոխանակվել։ Եվ երբ ես վերջին անգամ խոսեցի այս մասին Euronews-ի եթերում, հույս ունեի, որ Հայաստանը չի հետաձգի մեր մեկնաբանությունների գնահատման գործընթացը։ Դրանցից վերջինը նրանց ուղարկել ենք սեպտեմբերի 11-ին, իսկ պատասխանը ստացել ենք ընդամենը երկու օր առաջ։ Այսինքն՝ նրանք գրեթե երկուսուկես ամիս գնահատում էին համաձայնագրի նախագիծը, որը բաղկացած էր մի քանի էջից։ Ի՞նչ է դա նշանակում: Սա նշանակում է, որ նրանք ցանկանում են արհեստականորեն ձգձգել գործընթացը։ Արդեն նոյեմբերի վերջն է։ Իհարկե, խաղաղության հասնելու և խաղաղության պայմանագրի ստորագրման վերաբերյալ լավատեսությունը տարեվերջին նվազել է։ Բայց կարծում եմ, որ ժամկետներն այստեղ այնքան էլ կարևոր չեն։ Կարևորը երկու երկրների օրակարգն է: Հենց Ադրբեջանն է ենթարկվել օկուպացիայի և էթնիկ զտումների։ Հայաստանի կառավարությունը արտաքսել է մեկ միլիոն ադրբեջանցիների, իսկ գրեթե 15 հազար քառակուսի կիլոմետր տարածք ամայացվել է»։
Նախագահ Իլհամ Ալիևն ընդգծել է, որ, այնուամենայնիվ, Ադրբեջանն այն երկիրն է, որը առաջարկեց ստորագրել խաղաղ պայմանագիր և սկսել սահմանազատման ուղղությամբ աշխատանքները։ «Հիմա, «Ղարաբաղի պորտֆելի» փակումից հետո, կարծում եմ, Հայաստանն ավելի պատրաստակամ կլինի համաձայնության գալ մեզ հետ։ Որովհետև մեր ինքնիշխանության վերականգնումից և Ղարաբաղում ապօրինի անջատողական վարչակարգի լուծարումից հետո, կարծում եմ, այն հիմնական գործոնը, որը խանգարում էր Հայաստանին ավելի համարձակ լինել բանակցային գործընթացում, այլևս գոյություն չունի»,- նշել է նախագահը:
Երկրի ղեկավարն ասել է, որ ադրբեջանական կողմը կգնահատի Հայաստանի վերջին առաջարկները և կմեկնաբանի դրանք։ «Միևնույն ժամանակ մենք աշխատանքային մակարդակով կապ ենք պահպանում տարբեր պաշտոնյաների միջև և տարբեր խողովակներով։ Կարծում եմ, որ խաղաղությունն այլընտրանք չունի։ Եթե խաղաղության պայմանագիր չստորագրվի, դա շատ վատ կլինի ողջ տարածաշրջանի համար։ Մենք ուզում ենք, որ Հարավային Կովկասի տարածաշրջանը պաշտպանված լինի ցանկացած ռիսկից: Եվ, իհարկե, մենք ցանկանում ենք, որ Հայաստանն այսօր և ապագայում երբեք կասկածի տակ չդնի մեր տարածքային ամբողջականությունը և ամբողջությամբ հրաժարվի Ադրբեջանի նկատմամբ որևէ տարածքային պահանջից»,- ընդգծել է Ադրբեջանի նախագահը։