Ալիևը՝ Տոկաևին. Մենք հատուկ նշանակություն ենք տալիս ադրբեջանա-ղազախական հարաբերությունների զարգացմանը

Ադրբեջանի նախագահ Իլհամ Ալիևը շնորհավորական նամակ է հղել Ղազախստանի նախագահ Կասիմ-Ժոմարտ Տոկաևին։

Ինչպես հայտնում է Caliber.Az-ը, նամակում ասվում է.

«Ղազախստանն արագ զարգացող, արդիականացող և օրեցօր հզորացող պետություն է։ Ձեր վճռական ղեկավարությամբ իրականացված զգալի բարեփոխումներն ապահովել են Ձեր երկրի սոցիալ-տնտեսական վերելքը, բարձրացրել նրա հեղինակությունը միջազգային ասպարեզում։

Մենք առանձնահատուկ կարևորում ենք պատմական խորը արմատներ ունեցող ադրբեջանա-ղազախական հարաբերությունների համակողմանի զարգացումը, որոնք կառուցված են եղբայրության և փոխվստահության վրա և այսօր նոր բովանդակություն են ստանում։ Մեր բազմավեկտոր կապերն ու արդյունավետ փոխգործակցությունը ինչպես երկկողմ, այնպես էլ բազմակողմ հարթությունում, մեր միջպետական հարաբերությունները բնութագրող հիմնական հատկանիշներն են։

Տնտեսական, տրանսպորտային, լոգիստիկայի, ենթակառուցվածքների, էներգետիկայի, հումանիտար և այլ ոլորտներում մեր համագործակցության խորացումը, մշտապես ընդլայնվող քաղաքական երկխոսության հետ մեկտեղ, վկայում են մեր գործընկերության բարձր մակարդակի և դինամիկ զարգացման մասին։

Վստահ եմ, որ, օգտվելով առկա հնարավորություններից՝ մենք կհասնենք Ադրբեջանի և Ղազախստանի միջև բացառիկ կապերի ամրապնդմանը, փոխադարձ հետաքրքրություն ներկայացնող համագործակցության հետագա խորացմանը»։