Բուլղարիայի նախագահը հետաձգել է այցը Բաքու

Բուլղարիայի նախագահ Ռումեն Ռադևը մարտի 29-ին զանգահարել է Ադրբեջանի նախագահ Իլհամ Ալիևին։

Ինչպես հաղորդում է Caliber.Az-ը, այս մասին տեղեկությունը զետեղված է Ադրբեջանի Հանրապետության ղեկավարի պաշտոնական կայքում։

Ռումեն Ռադևը ափսոսանք է հայտնել, որ Բաքու նախատեսված այցն անսպասելիորեն հետաձգվել է իր երկրում ներքաղաքական պարտավորությունների պատճառով։

Պետությունների ղեկավարները քննարկել են փոխադարձ հետաքրքրություն ներկայացնող ոլորտներում երկկողմ համագործակցության խորացման հեռանկարները։ Ընդգծվել է, որ էներգետիկայի, ներդրումների, տրանսպորտի, բիզնեսի աջակցության ոլորտներում համագործակցության զարգացման լայն հնարավորություններ կան։ Նշվել է, որ պայմանագրաիրավական բազայի ընդլայնման երկկողմ փաստաթղթերը համաձայնեցման փուլում են։ Հեռախոսազրույցի ընթացքում պետությունների ղեկավարները նշել են, որ այցի նոր ժամկետը կհամաձայնեցվի դիվանագիտական խողովակներով։