Իլհամ Ալիևն ընդունել է ԵԱՀԿ գործող նախագահին

Մայիսի 14-ին Ադրբեջանի նախագահ Իլհամ Ալիևն ընդունել է՝ ԵԱՀԿ գործող նախագահ, Մալթայի արտաքին, եվրոպական գործերի և առևտրի նախարար Յան Բորգի գլխավորած պատվիրակությանը։

Ինչպես հայտնում է Caliber.Az-ը, այս մասին տեղեկություն է տեղադրված ԱՀ ղեկավարի պաշտոնական կայքում։

Հանդիպմանը Յան Բորգը նշել է, որ Մալթան աջակցում է՝ Ադրբեջանի և Հայաստանի միջև հարաբերությունների կարգավորման գործընթացին և խաղաղության պայմանագրի վերաբերյալ բանակցություններին։

Իլհամ Ալիևն ընդգծել է, որ հենց Ադրբեջանն է նախաձեռնել Հայաստանի հետ խաղաղության գործընթացը և դրա հիմքում ընկած հիմնարար սկզբունքները՝ նշելով, որ խաղաղության պայմանագրի տեքստը նույնպես պատրաստվել և քննարկման է ներկայացվել ադրբեջանական կողմից։ Պետության ղեկավարն ասել է, որ խաղաղության օրակարգն առաջ մղելու համար Ադրբեջանի և Հայաստանի միջև բանակցությունները շարունակվում են։

Իլհամ Ալիևն ընդգծել է, որ թեև Ադրբեջանի դեմ Հայաստանի ռազմական ագրեսիայի հետևանքների վերացումը և մեր հողերի օկուպացումը եղել են ԵԱՀԿ օրակարգում նրա ստեղծման օրվանից, սակայն ոչ այս կազմակերպությունը, ոչ էլ ԵԱՀԿ Մինսկի խմբի համանախագահության մեխանիզմը ոչինչ չեն արել՝ հակամարտության հետևանքները հաղթահարելու, ադրբեջանական հողերը օկուպացիայից ազատագրելու և հարկադիր վերաբնակների վերադարձի համար։ Նախագահը հայտարարել է, որ բանակցային գործընթացը, որը երկար տարիներ վարում էին ԵԱՀԿ Մինսկի խմբի համանախագահները, ծառայել է ադրբեջանական տարածքների օկուպացիայի շարունակմանը։

Իլհամ Ալիևն ընդգծել է, որ Ադրբեջանը իր կամքով և ուժով, միջազգային իրավունքի նորմերին ու սկզբունքներին համապատասխան, ՄԱԿ-ի կանոնադրությանը համապատասխան, ապահովել է տարածքային ամբողջականությունն ու ինքնիշխանությունը՝ վերջ դնելով օկուպացիային։ Պետության ղեկավարը հայտարարել է, որ քանի որ հայ-ադրբեջանական հակամարտությունն արդեն անցել է պատմության գիրկը և այլևս գոյություն չունի, եկել է ժամանակը՝ լուծարելու ԵԱՀԿ Մինսկի խումբը և նար հետ կապված բոլոր կառույցները։ Նախագահը հայտնել է, որ ադրբեջանական կողմը բարձրացրել է այս հարցը, և հայկական կողմը դրա հետ չհամաձայնելու պատճառ չունի։