Իրանը կրկին սպառնում է Ադրբեջանին` Իսրայելի հետ բարեկամության պատճառով ԻՀՊԿ-ն վախեցած է Գալանտի այցից

Իրանական «Փարս» լրատվական գործակալությունը, որը պատկանում է Իսլամական հեղափոխության պահապանների կորպուսին, խմբագրական հոդված է հրապարակել, որտեղ սպառնում է Ադրբեջանին Իսրայելի հետ համագործակցության համար:

Ինչպես գրում է 9tv.co.il-ին՝ հոդվածի հայտնվելու անմիջական պատճառ է հանդիսացել հուլիսի կեսերին Իսրայելի պաշտպանության նախարար Յոավ Գալանտի այցը Ադրբեջանի մայրաքաղաք։ Նշվում է, որ Գալանտը եռօրյա այցի ընթացքում բանակցություններ է վարել պաշտպանության նախարար Զաքիր Հասանովի, սահմանապահ զորքերի հրամանատար Էլչին Գուլիևի և Ադրբեջանի իրավապահ մարմինների բարձրաստիճան այլ պաշտոնյաների հետ։

«Պարս»-ի հոդվածում այս այցը ներկայացվում է որպես ապացույց առ այն, որ իբր «Ադրբեջանի կառավարությունը գործում է Իսրայելի ռասիստական ռեժիմի խորհրդով և ուղիղ հրահանգներ է ստանում այդ ռեժիմի դիվանագետներից»։ Նյութի հեղինակն այնուհետև գրում է, որ «Իսրայելի իշխանությունները Բաքվին նախապատրաստում են Իրանի հետ ավելի ինտենսիվ թշնամական գործողությունների՝ Հայաստանի հետ խաղաղության համաձայնագրի ստորագրումից հետո ընկած ժամանակահատվածում»։ Որպես նման «պատրաստության» օրինակ՝ մատնանշվում է վերջերս իսրայելցիների կողմից Բաքվում ռազմական խոշոր կիբերկենտրոնի ստեղծումը։

Հոդվածագիրը մեջբերում է իրանցի ռազմական վերլուծաբանի խոսքերը. «Նույնիսկ եթե Ադրբեջանը չմասնակցի Իրանի դեմ ուղղված իսրայելական կոալիցիային, պատերազմի դեպքում Իրանը առաջին հերթին կհարվածի Ադրբեջանին»: