Ադրբեջանը STEAM կենտրոն կստեղծի՞ Վրաստանում

Բաքվում տեղի է ունեցել Վրաստանի կրթության, գիտության և երիտասարդության նախարար Գիվի Միկանաձեի և Ադրբեջանի գիտության և կրթության նախարար Էմին Ամրուլլաևի հանդիպումը։

Ինչպես տեղեկացնում է Report-ը, հանդիպման ընթացքում կողմերը քննարկել են երկու երկրների կրթական համակարգում իրականացվող բարեփոխումները, ընթացիկ համագործակցությունը և ապագայի համար առաջնահերթ ոլորտները։

Գիվի Միկանաձեն նշել է, որ Վրաստանը մի շարք նախաձեռնություններ է իրականացնում՝ աջակցելու ադրբեջանցի դպրոցականներին, ուսանողներին և ուսուցիչներին։ Մասնավորապես, նրանք քննարկել են դպրոցներում լեզուների դասավանդման ամրապնդման և համալսարաններում ֆինանսավորման ավելացման ծրագրերը։

Կողմերը հատուկ ուշադրություն են դարձրել STEAM կրթության (գիտություն, տեխնոլոգիա, ճարտարագիտություն, արվեստ և մաթեմատիկա) ոլորտում համագործակցության զարգացմանը։ Ադրբեջանական կողմը հանդես է եկել Վրաստանում STEAM կենտրոն ստեղծելու նախաձեռնությամբ։ Գիվի Միկանաձեն աջակցություն է հայտնել այս առաջարկին։