Հարավային Կովկասում նոր իրողություններ և ստատուս քվոն ձևավորվում են արդար խաղաղության հայեցակարգի հիման վրա. Հաջիև

Ադրբեջանի նախագահի օգնական Հիքմեթ Հաջիևը հայտարարել է, որ Բաքվի և Երևանի միջև ԱՄՆ միջնորդությամբ կնքված համաձայնագիրը Ադրբեջանում դիտվում է որպես փաստաթուղթ, որն ամրագրում է տարածաշրջանում միջազգային իրավունքի օրինականությունը, իրավական հիմքերը և հիմնական սկզբունքները: Նրա խոսքով՝ Հարավային Կովկասում «արդար խաղաղության» հայեցակարգի հիման վրա ձևավորվում են նոր իրողություններ և ստատուս քվոն, հաղորդում է Al Jazeera-ն:

Ելույթ ունենալով Դոհայի միջազգային ֆորումում «Հայաստան-Ադրբեջան. տևական խաղաղություն: Վաշինգտոնյան համաձայնագիրը և ընդհանուր ապագան» թեմայով պանելային քննարկումների ժամանակ՝ Հաջիևը նշել է, որ կարգավորման նախորդ բազմաթիվ փորձերը ձախողվել են, քանի որ կողմերը համաձայնագրերը ստորագրելուց հետո մտել են «հարմարավետության գոտի»: Նա ընդգծել է, որ Բաքուն և Երևանը ձգտում են խուսափել նման սցենարից և գիտակցում են, որ կայուն խաղաղության հասնելը պահանջում է մշտական և լարված աշխատանք:

Հաջիևի խոսքով՝ երկու մայրաքաղաքների միջև պահպանվում են կանոնավոր շփումներ տարբեր խողովակներով, և երկու կողմերն էլ ջանքեր են գործադրում ձեռք բերված պայմանավորվածությունները լիարժեք իրականացնելու համար: